Gullas, officials sa 1st district mobalhin

TANANG opisyal sa unang dis­trito sa lalawigan sa Sugbo, lakip na ang barangay officials, pinangulohan ni Kongresista Samsam Gullas moapil sa mass oath taking sa Partidong Demokrati­kong Pilipino (PDP-LABAN) nga gikatakda karong Nobiyembre 17 sa South Road Properties.

Si Kongresista Gullas nibutyag nga sigun sa iyang gipatawag nga meeting, nasabotan sa tulo ka mga mayor sa siyudad sa Talisay, Naga ug Carcar ug tulo ka mga mayor sa lungsod sa Minglanilla, San Fernando ug Sibonga nga motapon sila sa partido sa administrasyon.

Matod ni Gullas nga nananghid na sila sa pangulo sa ilang partido, Nacionalista Party, nga si kanhi senador Manny Villar nga manumpa sila sa PDP-Laban ug misugot ra usab kini.

Apan iyang gibutyag nga ang dakong rason sa ilang pagtabok sa laing partido mao ang tinud-anay nga pagpanerbisyo sa katawhan, diin ang kaayohan ug proyekto nga mahatag kon anaa sila sa administrasyon dakog bintaha.

Siya niingon nga kon mag-usa ang tingog sa mga opisyal sa tibuok unang distrito, dakog purohan nga paminawon.

Matod niya nga apil na ang tanang mga barangay kapitan ug mga lider manumpa samtang bukas usab niadtong oposisyon nga mobali.

Giklaro ni Gullas nga bisan og nibali na sila sa laing partido, magpadayon ang ilang suporta kang Gobernador Hilario Davide III.

Si Mayor Eduardo Gullas sa Talisay ug kanhi kongresista niingon nga ang ilang pagbalhin sa laing partido tungod lang sa pagpailawom sa admi­nistrasyon ug wa matuki ang sa umaabot nga 2019 elections.

Apan kon kinsa man ang paluyohan sa ila unyang partido, di usab sila makabalibad sa pagsuporta niini.

Giklaro ni Mayor Gullas nga kining tanan mag-depende unya sa iyang apo kinsa mao karoy ilang lider sa partidong Alayon.

Ang Alayon Party sa miaging eleksyon didto kini misuporta sa kandidarota ni kanhi senador Mar Roxas sa Liberal Party.

Samtang ang One Cebu Party nga maoy orihinal nga coalition partner sa PDP Laban sa miaging eleksiyon, nihangop sa pagtapon sa grupo.

Matod sa ilang founder nga si Kong. Gwendolyn Garcia, maghugpong karong Biyernes sa Plaza Independencia ang tanan nilang sakop sa partido ug nagtuo siya nga kining bag-ong panaghiusa, makaayo sa Sugbo.

Alang ni Garcia, dili lamang kutob sa politika ang tinguha sa pagpalig-on sa PDP-Laban dinhi sa probinsiya, kundi aron suportahan ang mga prayo­ridad ni Presidente Rodrigo Duterte nga naglakip sa fede­ralism ug sa kampaniya kontra kriminalidad ug drugas.

“More importantly, however, One Cebu is hopeful that beyond political convenience, this united force will rally behind and help institutionalize the priority programs of President Duterte, chief among which are; (1) federalism; (2)the war against drugs and criminality; (3) the war against poverty; and (4) the redistribution of the nation’s weath to the Visayas and Mindanao through infrastructure spending,” tipik sa pamahayag ni Deputy Speaker Garcia. (AZDL)