PDEA andam sa tahas

PHILIPPINE Drug Enforcement Agency (PDEA) 7 nakadawat na sa kamandoan gikan kang President Rodrigo Duterte nga sila na ang gitahasan pagmolusad sa anti drug operation bisan ka kagamay sa ilang pwersa.

Ang officer-in-charge (OIC) sa PDEA 7, Atty. Ana Lynn Hernandez Nob, nagkanayon nga ilang kayahon ang gi­sangon nga trabaho sa ilang ahensya bisan sa kagamay og personnel.

Ang PDEA 7 aduna lamay 46 ka mga ahente, 36 ka administrative officer ug napulo ka contractual nga empleyado.

Matod ni Nob nga mahimo gihapon nga makatabang kanila ang ubang mga ahensya nga sakop sa Inter Agency Committee on anti illegal drugs (ICAD) ug komunidad.

Adunay 20 ka mga ahensya sa gobyerno nga naglangkob sa ICAD, usa niini ang kapulisan ug ang armadong kusog sa nasud, diin sila ang mohatag og impormasyon sa PDEA sa mga nalambigit sa illegal nga kalihukan.

Gipasabot sa PDEA 7 nga makadakop pa gihapon ang kapulisan sa mga drug personalities apan di na mahimong plano nga operasyon sama sa plain view nga doktrina nga ang usa ka tawo nagdala og illegal nga drugas.

“In the memorandum that the PNP or the NBI and the AFP will only relay information to PDEA and PDEA will take the appropriate action but they can conduct check points and they can also do inflagrante delicto arrest.”

Ang director general sa PDEA Aaron Aquino, mipasupot na og kamandoan sa tanan nilang buhatan nga ilang targeton karon ang mga big time drug lords nga naglihok sa tibuok nasud.

Wa usab mabalaka ang kapulisan sanglit wa sila did-i nga mosikop sa mga nakahimo og krimen, usa niini ang nalambigit sa illegal nga drugas.

Matod ni Supt. Ryan Ma­nongdo, deputy provincial director for operation sa Cebu Provincial Police Office, ilang estriktong ipatuman ang patrol 101 diin makita na sa karsada ug komonidad ang kapulisan alang sa pagukod sa nakahimo og krimen. (AYB)