Mga pulis sa Talisay taktakon

NABUTANG sa peligro ang tanang police personnel sa Talisay City police station human gitagalan sila og duha ka mga semana sa pagpakunhod sa ilang crime volume kay kon mapakyas, silang tanan hulipan.

Sa datos sa Cebu Provincial Police Office Operation Branch nisaka ang crime volume sa syudad sa Talisay nga maoy hinungdan nga milusad na og pakisusi ang Cebu Provinical Police Office (CPPO) kon unsay hinungdan.

Human sa evaluation ug pag-analisar sa mga insidente sa patay sa maong siyudad, nihatag na og duha ka semana nga tagal ang bag-ong hepe sa CPPO, Sr. Supt. Edgar Alan Okubo, nga kon di sila makasulbad sa mga krimen, paphaon ang tanang personnel ug ipaubos sa re-training.

Matod ni Supt. Ryan Ma­nongdo, deputy provincial director for operation, nga sa pagkakaron wala pa silay parelibohan sa katungdanan sukwahi sa unang migawas nga report nga dunay lima.

“Pag hindi nila mapa baba ang crime incident nila, then there is something wrong with them, not the system, not the leadership and not the support,” matod ni Manongdo.

Adunay 73 ka mga personnel ang syudad sa Talisay nga kandidato ang tanan nga hulipan kon di makasulbad sa mga kaso sa patay sa maong syudad.

Nasagmuyo si Manongdo nga bisan sa ilang pagpaubos kanila sa seminar sa taas nga panahon unsaon ang pagsulbad ug pagpugong sa krimen pinaagi sa police visibility, padayon nga pakyas ang kapulisan sa syudad sa Talisay.

Nagtuo siya opisyal nga du­nay problema sa personnel ug walay kalabutan niini ang ilang hepe sanglit bag-o pang nihulip si Supt. Jason Villamater.

Gihagit niya ang kapulisan sa Talisay nga ipakita nga sayop ang publiko sa ilang pagtuo nga wa molihok ang kapulisan sa mga insidente sa ilang area of operation.

Samtang giduso na sa Regional Intelligence Division ang mga ngalan sa tulo ka mga pulis sa Talisay nga gireklamong nangilkil sa tag-iya og motorsiklo nga ilang gidakop.

Wa hinuoy kalabutan niini ang team leader nga si SPO4 Rolando Andales sanglit ang iyang sakop maoy gitudlo sa biktima nga maoy nangayo kaniya og P4,000 bugti sa paghatag sa gidakop nga motor.