Ginang gibinlan na lang og kuptanan sa bag

GINANG niabot sa Talisay Police station nga kuptanan na lang sa iyang shoulder bag ang nahabilin human gilabni sa wa mailhing tawo nga sakay sa motorsiklo.

Gumikan niini, kapulisan sa Talisay City nipahimangno nga di mokompyansa karong panahona ilabi na kay nag-angat na ang ilang pista ug daghang mga baglungon ang mopahimulos sa higayon.

Ang ni-report sa kapulisan giila nga si Josephine Cansacion, hingkod, taga barangay Tanubok sa maong siyudad.

Sigun sa iyang asoy nga ka­gahapon pasado alas 9 sa buntag, nagsakay siyag traysikol habig sa luyo sa drayber.

Paghiabot sa may City Central School sa barangay Poblacion, usa ka wa mailhing tawo nga nag-angkas sa motorsiklo ang nilabni sa iyang bag nga gikuptan.

Gumikan sa iyang pagpugong nga di makuha, nasamad pa ang iyang tudlo ug nagisi ang bag ug ang kuptanan nalang ang nahabilin human magisi.

Iyang gibutyag nga ang bag adunay sulod nga P4,000 ug du­ha ka mahalong mga cellphone ug mga impotarting dukomento.

Gisuwayan sa kapulisan sa Talisay pag-subay sa nahitaboan kuyog si Cansacion apan wa na niya makit-i pa ang mga kawatan. (DRT)