Gikulata, gidul-itag pusil

GIBUN-OG sa wa pa pusila ang gidudahan nga kawatan nga nadakpan sa mga barangay tanod sa Ermita.

Subay sa autopsy report ni PNP medico legal officer Dr. Benjamin Lara nga namatay si Lendon Abadinas sa samad pinusilan sa wala nga dughan.

Dul-it ang pagpusil nga gibana-bana nga di mosobra og singko metros ang gilay-on.

Nakita usab sa autopsy nga may samad sa agtang si Abadinas nga posibling naigo o gibunalan og gahi nga butang.

May mga bun-og ang nagkadaiyang parti sa iyang lawas, matod sa report ni Lara.

Matod pa ni SPO2 Wetzil Berry sa Homicide Section nga tataw kaayo ang report nga gikulata si Abadinas sa wa pa gipusil nga nitakdo sa pamahayag sa duha ka mga saksi.

Samtang nagpabilin nga way nikuha sa lawas ni Abadinas sa punerarya.

Sa miaging adlaw, ang kapolisan nipasaka og kasong murder batok sa duha ka mga tanod nga sila si Junnel Sanchez ug Jerome Miral.

Samtang laing kaso nga illegal possession of firearm ang gipasaka batok kang Sanchez.

Unang nitahan si Sanchez human sa hitabo.

Nanghimakak siyang ilang gikulata ug gipusil si Abadinas kay matod niya aksidente ang pagbuto sa armas. (JFT)