Sakop sa Sadaya group nasikop

TULO ka mga high-value target, duha niini managsuon ang nangasikop sa kapulisan sa dakbayan sa Mandaue, niadtong Martes sa hapon.

Lakip sa naaresto sa mga operatiba mao ang usa ka miyembro sa notadong Sadaya drug Group sa Brgy. Canduman.

Unang nadakop sa kapulisan sa Station 5 sa Mandaue City Police Office ubos sa pamunuan ni PCI Wilbert Parilla ang managsuon nga sila si Mark Anthony Mondejar alyas Apyong, 22 anyos, ug Lyko Mondejar, 18 anyos, lumolupyo sa Purok Star Apple, brgy. Umapad sa nahisgutang dakbayan.

Ang duha nasikop atol sa operasyon sa Station 5 mga alas 5:35 sa hapon didto sa San Jose village, Brgy. Umapad.

Nasuta ning mantalaan gikan ni PCInsp. Mercy Villaro nga ang duha nalakip sa watch list sa dakbayan nga nisaka ngadto sa Top 10 High-Value Target list sa MCPO.

Nakuha sa duha atol sa buy-bust ang unom ka pakete sa gituohang shabu, mga drug paraphernalia, ug P200 nga buy-bust nga kwarta.

Samtang didto sa Brgy. Canduman, nasikop usab ang usa ka miyembro sa Sadaya Drug Group nga si Arnold Jabas, 43 anyos, taga Zone 1 Bombil, sa maong barangay.

Gawas nga usa ka miyembro sa notadong grupo si Jabas, nasuta nga ang iyang amahan kanhi kawani sa Bureau of Jail Management and Penology (BJMP).

Tulo ka mga pakete sa gituohang shabu ang nakuha gikan ni Jabas uban sa duha ka P100 nga kwarta sa operasyon mga alas 5:40 sa hapon.

Ang tulo ka mga suspetsado kasamtangang gibalhug sa Station 5 ug Station 6 samtang gipaabot nga mapasaka ang mga tukmang kaso batok nila. (JPP)