Gasoline station sa SRP gitulis

USA ka gasoline station sa dakbayan sa Talisay ang na­kuhaan og P12,000 human kini ang nabiktima sa nag-inusarang tulisan.

Ang gitulis mao ang gasoline Station nga nahimutang sa Cebu South Coastal Road sa Barangay San Roque, Talisay City, kagahapon sa alas 3:00 sa kadlawon.

Si PO3 Jason Del Campo sa Talisay City Police Station niingon nga base sa ilang gihimong imbestigasyon ang tulisan nagsakayg motorsiklo ug nagpagasolina.

Apan wala kini mobiya ug nagpaabot lang sa higayon nga momingaw.

Paglabay sa pipila ka mi­nutos nabantayan sa pump boy nga si Roland Barbac, 23 anyos, nga nibalik maong ang lalaki.

Matod pa, kalit siyang gitiunan og armas sa wa matinong kalibre dungan sa pagdeklarar og tulis.

Nideritso kini sa cashier nga si Jackelen Mendez, 20 anyos, dayog kuha sa ilang kita nga P12 mil pesos.

Aduna unta silay guwardiya apan wala usab makabantay tungod kay didto man kini nianang higayona sa tindahan sa maong gasoline station. Apan matod ni PO3 Del Campo nga bisan pa og nakabantay ang guwardiya wala usab kini mahimo tungod kay wala man kini armas.

Ang kapulisan sa Talisay naglisod sa pag-ila sa tulisan bisag adunay kuha sa CCTV tungod kay nag-helmet man kini. (DRT)