Dunay mga barangay official nga nalambigit sa drugas; Osmeña nabalaka sa drop box

GIBUTYAG ni Mayor Tomas Osmeña nga adunay mga barangay official nga nalambigit sa kalihukan sa ginadiling drugas mismo sa ilang barangay nga gialagaran.

Apan ang mayor wa nihingan sa barangay ug mismo sa kapitan apan iyang giabisohan ang katawhan sa pagbantay hilabi sa ilang mga barangay diin nagpalibot ang mga close circuit television (CCTV) camera nga gipanag-iya sa barangay.

Ang pamahayag sa mayor nitumaw human nisugyot ang Department of Interior and Local Government nga mas maayo nga mobutang og mga drop box ang barangay sa ilang barangay hall ug adto ihulog ang mga ngalan sa drug pusher o drug lord nga naglihok sa ilang teritoryo.

Kini human nilusad og kampanya si Kapitan Felicisimo “Imok” Rupinta pinaagi sa pagbutang og tarpaulin nga adunay nakasuwat nga “drug free home” sa mga balay nga kanhi gihimong drug den.

Gialisto ni Osmeña ang mga tawo nga di mokompyansa sa paghulog sa drop box sanglit posible kining mamonitor sa mga drug pusher o drug lord ug mameligro na hinuon ang ilang kinabuhi.

Mas maayo nga mosugo sila og mga tawo nga dili ilado sa ilang barangay aron maoy mohulog sa ngan sa drop box.

“There are some barangay officials who are involved in drugs and they have CCTV all over. So they might identify who is putting this report in the box,” pahimangno ni Osmeña.

Bisan kon wa nganli ni Osmeña ang mga barangay apan sa nangaging mga buwan, subli niyang gipasanginlan nga adunay kalambigitan sa pagpayuhot sa illegal nga drugas ang mga opisyal sa Ermita nga kusganon usab nga gihimakak ni Rupinta, inay gusto nila nga mawagtang ang shabu sa ilang dapit.

Lakip sa mga barangay nga notado sa Phillipine Drug Enforcement Agency (PDEA) diin mapalit ang daghang shabu mao ang Pasil, Suba, Sawang Calero, Duljo Fatima, Calamba, Labangon ug ubang barangay apan giingong nagnihit na karon ang suplay ug niabot na og tag P500 ang pakete niini. (PAC)