'Satanic' nga rosaryohan naa sa Cebu; di angay nga kahadlukan: Archdiocese

GIKOMPIRMAR sa Archdiocese of Cebu nga anaa na sa Sugbo ang “satanic rosary” kun kining rosaryohan nga adunay simbolo sa yawa.

Ang rosaryohan, usa ka simbolismo nga gamit sa Simbahang Katoliko sa panahon sa pag-ampo.

Matod ni Msgr. Joseph Tan, tigpamaba sa Archdiocese of Cebu nga aduna’y taho sila nga nadawat nga nakaplagan mismo sulod sa simbahan sa Santo Tomas de Villanueva sa Pardo, dakbayan sa Sugbo ang susama sa satanic rosary.

Dugang ni Tan nga duha ka semana ang niagi dihang gibalita sa Catholic Bishops’ Conference of the Philippines (CBCP) kabahin sa maong rosaryohan nga aduna’y elemento sa yawa.

Gihulagway pa kini nga usa ka ordinaryo nga rosaryohan apan adunay mga simbolo nga iya sa yawa.

Susama niining bitin ibabaw sa ulo ni Hesukristo nga susama siya og gitukob niini ubos sa suwat nga “INRI”.

Apan tambag ni Tan sa publiko nga di mahadlok ug di usab maalarma niini tungod kay kon hugot ang pagtuo sa labing gamhanan, dili kini makaapekto sa tawo nga nakadawat niini.

“So di ta mahadlok, di nato tagaan og gahom ang dautan more than it is capable of doing.”

Gituohan usab nga kon anaa ka niini nga rosaryohan susama ka og gitunglo o makasinati ka og malas. (HBL)