Parking areas pangsusihon

KINAHANGLAN nga adunay business permit ang mga parking lot operator kinsa mangayo og parking fee sa mga motorista nga moparada sa ilang mga sakyanan dinhi sa dakbayan sa Sugbo.

Si Mayor Tomas Osmeña nagkanayon nga lahi ang business permit sa parking area ug lahi usab ang business permit sa mga tenant kinsa nag-okupar sa mga business establishment.

Ang pamahayag sa mayor nitumaw human adunay duha ka parking lot sa IT Park nga way business permit ug nangolekta og taas nga parking fee sa mga motorista hilabi na ang mga call center agent.

Ang duha ka parking lot gipadad-an na og show cause order sa City Legal Office ubos sa direktiba ni Osmeña aron pa-isplekaron kon nganong di sila sirad-an bisan kay way mayor’s business permit ug wa magbayad og business tax sa Cebu City Government.

Ang mayor nagkanayon nga wala na siya makaihap gumikan sa kadaghan sa mga reklamo nga iyang nadawat gumikan sa kadako sa gipaningil nga parking fee sa maong mga parking lot.

Base sa reklamo, ang motorsiklo magbayad og P50 sa unang upat ka oras ug laing tag P10 sa mosunod nga mga takna nga gikaalarma sa mayor.

Gumikan niini, si Osmeña nihangyo sa buhatan ni Gobernador Hilario Davide III aron magamit ang bakanteng luna duol sa IT Park aron adunay kaparkingan ang mga motorista. (PAC)