P200,000 ganti sa motudlo sa killer

ANG Kagamhanan sa Dakbayan sa Mandaue mitanyag og P200,000 nga ganti niadtong makatudlo sa mga killer ni kanhi Mandaue city councilor Beethoven “Toben” Andaya.

Mao kini ang gibutyag ni Konsehal Malcolm Sanchez, pag-umangkon ni Andaya, human mobisita si Mandaue City Mayor Luigi Quisumbing sa haya sa kanhi konsehal kagahapon sa buntag.

Matod ni Sanchez nga nisulti kanila si Quisumbing kalabot niini hinungdan sa ilang kalipay.

“Lipay kaayo mi kay maka­paspas ni sa pagsulbad sa kaso,”nagkanayon si Sanchez sa interbyu sa GMA 7 Balitang Bisdak.

Si Andaya napalgang patay sa usa ka resort sa Brgy. Liloan, Santander niadtong Lunes sa buntag.

Gituohan nga ang duha ka mga lalake nga nakit-ang ningsulod sa iyang lawak niadtong Dominggo sa gabii may kalabutan sa krimen.

Base sa autopsy report, posibleng nisukol si Andaya sa iyang killer base sa samad sa iyang kamot.

Samtang ang Konseho sa Mandaue City mopalabang og resulusyon nga magpahasubo sa pamilyang Andaya. (REV)