P1,000 makapiang: CHR 7

POSIBLENG mabaldado ang operasyon sa Commission on Human Rights kana kon mapatuman ang giaprobahan sa mayoriya sa kongresista nga P1,000 nga budget alang sa ilang ahensiya sa 2018.

Matod ni CHR 7 Regional Director Arvin Odron nga wa malipay ilang personnel, human rights advocates ug supporters sa maong lakang sa Lower House nga hatagan lang sila og P1,000 nga budget sa 2018.

Dugang niya nga anaa nagbase sa General Appropriations Act ang sweldo sa ilang personnel ingon man sa ubang mga ahensiya sa gobyerno.

Hinuon, malaumon si Odron nga mahatagan sa Bicameral Committee nga naglangkop sa mga kongresista ug senador ang ilang ahensiya og mahinungdanon nga budget sa sunod tuig.

Gipasabot niini nga pasado na sa Committe on Approriations sa House of Senate ang 2018 budget nga P678 million, mas ubos sa approved budget karong tuiga nga P749 million.

“We hope that the members of the Bicameral Committee will agree and give a reasonable budget for CHR," si Odron sa text message niini sa Superbalita Cebu. (HBL)