Collector sa Mercado gireklamong nanapat

CARETAKER ug collector sa Mercado sa lungsod sa Minglanilla nga si Arlee Selma ang gipasanginlan nga nanapat og usa ka tindera diha sa ilang merkado.

Ang 57 anyos nga biktima nga si Luzminda Uba miingon nga kini nahitabo sa dihang nagbasa siya sa Superbalita ka­labot sa nangataktak nga walo ka mga opisyal sa ilang lungsod niadtong Dominggo sa udto.

Apan hugtanong gipanghimakak ni Selma ang pasangil ug mihulagway sa biktima nga bastos og baba.

Nahitabo ang insedenti sulod mismo sa buhatan sa market administrators office nga diha ra usab sa ilang merkado publiko sa Poblacion Ward-1.

Gitumbok ni Uba ang usa ka Bella Auman, job order employee kinsa maoy tiglimpyo sa ilang merkado, ang nisumbong ug nagpahaba ngadto ni Selma kalabot sa iyang komento sa pagkataktak sa walo ka department heads sa maongA lungsod.

Si Uba Nidugang pagsaysay, nga samtang didto siya sa sulod opisina nga may labing minus pito ka mga tawo, gitulisok ug gidapog ang iyang tuo nga bukton ni Selma.

Human sa hitabo naghilak siya nga nigawas ug usa ka Roel Tecson, collector usab, ang miapas ug mihata pagsukmag kaniya.

"Dunay nagsulti nako nga naka-inom daw si Arlee mao nang nadapatan ko. nasuko sila nga igo raman kong nisulti sa akong gibasa sa Superbalita,”asoy ni Uba.

Apan sa ilang bahin, si Auman miingon nga aduna’y trak nga mo-parking unta sa lugar nga parkingan sab sa garbage trak.

Ila kining gibadlong ug gipahibawo nga dili angay moparking sa maong dapit.

Matod ni Auman nga si Uba masuk-anon ug dako kaayog tingog nga dili angayang tuohan ang mga kawani ug opisyal sa munisipyo tungod kay mga kawatan kini.

Hinungdan nga gisumbong kini ni Auman ngadto ni Selma ug niadtong Dominggo gipatawag sa buhatan ni Selma si Uba aron klarohon ang maong pasangil.

Matod ni Selma nga wala gyud niya kini dapati bisan gamay, gani mao pa gihapon kini isog ug bastos sulod sa ilang buhatan.

Gani sa pagdayog gawas gipangwakli pa ang mga resibo nga diha sa iyang lamesa.

Apan nahibulong nalang si Selma nga ni-report na kini ngadto sa barangay ingon man sa police station.

“Kon ako pa siya’ng gikulata, dili kaha siya mabaliwliw sa kadako nako,” matod ni Selma.

Sa iyang bahin, si Tecson mihimakak nga iyang gihan-an og sukmag si Uba kon dili igo lang kini niyang gibadlong nga dili magsiyagit-siyagit sa gawas nga kuno siya gitabangan og kulata.

Si PO3 Gilmer Noval nitambag sa biktima nga adto lang una kini husayon sa barangay ug didto ipakita ang iyang medical certificate nga siya nabun-og sa iyang tuong bukton tungod sa pagdapog.

Samtang si Concordio Mejias, municipal administrator, niingon nga base sa ilang pasiunang pakisusi di tinuod ang maong pasangil.

Hinunon aduna lay mga tawo nga misakay sa isyu aron lang pagdaot kanilang mga kawani sa munisipyo tungod kay naglagot nga gibalhin ang ilang merkado.

Apan bisan pa niini si Mejias miingon nga mohimo gihapon silag inbestigasyon. (DRT)