PNP spot report di na ipakita

NAKURAT ang mga sakop sa media sa Sugbo human masayod nga di na mahimong makatan-aw sa mga spot report gikan sa mga police stations sa tibuok lalawigan human nipagawas og kamandoan ang Camp Crame.

Ang spot report maoy basehan sa suwaton sa mga tigbalita sa mga insidente sa kalungsuran.

Gipaagi lang una sa Camp Crame ang ilang memorandum sa text message ug gipakatap sa mga city ug provincial directors.

Apan gipasabot ni Supt. Virgilio Bayon-on, hepe sa Police Community Relations sa Cebu Provincial Police Office, nga wa na silay mahimo sa maong kamandoan sanglit nagtuman ra usab sila unsay gustong ipahimo sa ilang mga labaw sa kampo Crame.

“Dili na pareha sa una nga open ta sa tanan. Karon nagsunod ra mi sa order gikan sa among labaw,” matod ni Bayon-on.

Gihimakak sa PCR chief nga dunay tensyon ang PNP ug mga sakop sa media.

Si Police Regional Office (PRO) 7 Director Jose Mario Espino niingon nga makakuha gihapon og kasayuran ang mga sakop sa media gikan sa mga opisyal.

Apan di na ikapakita ang mga police blotter kay basin makaapekto sa imbestigasyon. (AYB)