Nagduwelo sa buy bust

Flor V. Querubin

NAINGON og maorag salida ni Fernando Poe Jr. ang buy bust operation sa Lapu-Lapu City Police (LLCPO) niadtong Lunes sa gabii.

Ang gikatahapang drug pu­sher ug pulis nga poseur-buyer nahisama og nagduwelo.

Maayo gani kay igo rang nasamdan sa kamot ang suspetsadong drug pusher sa Barangay Buaya, Lapu-Lapu City nga giingong suway nga nisukol sa pulis atol sa buy bust operation sa Police Station 5.

Si Edgar Silawan, alyas Edu, 37, way trabaho, taga-Zone 3, barangay Buaya, sa naasoyng dakbayan unang nakaibot sa iyang armas ug nakasuway pagpusil.

Apan nikagar ang iyang .38 kalibreng rebolber dihang gipunting niya ang pulis nga poseur buyer.

Nakaibot sa iyang armas ang pulis ug gitiruhan si Silawan sa tuong kamot hinungdan nga iyang nabuhian ang armas.

Base sa inisyal nga imbestigasyon ni P01 Joule Tatoy sa Station 5 nga nakadawat ang ilang buhatan og tip kabahin sa illegal drug trade ni Silawan.

Sa ilang pagsusi, positibo ang taho.

Atol sa buy bust operation, nitunol si Silawan sa usa ka gamay nga pakete nga adunay sud nga gituohang shabu sa pulis nga nagpaka aron-ingnon nga buyer human makabayad og P200.

Nakapaduda ni Silawan ang poseur buyer dihang nisinyas kini.

Siya nagtuo nga pulis ang iyang gikaatubang hinungdan nga nibunot sa iyang .38 kalibreng rebolber apan napusilan na hinuon.

Sa dihang gikapkapan si Silawan kinsa nagpangwilik pa sa iyang kamot sa ka sakti, nakuhaan pa siya og dugang 10 ka pakete ug usa ka medium pack nga adunay sud nga gituohang shabu nga gibana-bana nga mokantidad ang tanan og P23,600.

Nabilanggo na si Silawan sa holding cell sa City Police Office ug nagpaabot sa tukmang kaso nga isang-at batok kaniya.