Kapitol nakakaplag og diversion road sa Norte

GIHANGOP sa kagamhanan sa lungsod sa Compostela ug sa siyudad sa Danao ang tinguha sa Kapitolyo pag-develop og diversion road gikan ug paingon sa dakbayan sa Sugbo ug sa bukirang bahin sa Compostela.

Kon mahuman na ang maong agi-anan, hayan nga duna nay alternatibong kaagian ang mga motorista ug dili na sila kinahanglang mosungasong pa sa traffic sa Consolacion ug Liloan area.

Gipahibalo sa Kapitolyo nga sugdan na sa sunod tuig ang concreting sa bag-ong nadiskubrehan nga dalan paingon sa lungsod sa Compos­tela, agi sa bukirang bahin sa dakbayan sa Sugbo.

Kon mopaingon sa amiha­nang Sugbo, magsubay ang maong rota gikan sa brgy. Talamban, agi sa brgy. Mabini ug Paril sa dakbayan sa Sugbo ug lahos sa mga barangay sa Dapdap, Mulao, Basak ug Cambayog, hangtud nga moabot sa Canamucan sa lungsod sa Compostela.

Matod ni Compostela Ma­yor Joel Quiño, dako kining tabang aron makalikay sa traffic ug mas mubo na ang travel time paingon ug gikan sa ilang lungsod. Maagian na usab ang ilang mga bukirang barangay, diin pabor nga makabaligya sa ilang abot ang mga mag-uuma.

Si Danao City Mayor Ramon “Nito” Durano III lakip sa nihangop sa nadiskubrehan nga diversion road. Matod niya, di momenus og duha ka oras ang biyahe gikan sa Danao paingon sa siyudad sa Sugbo ug vice versa. Kon anaa ang diversion road, hayan nga makadaginot sa oras ang mga motorist.

Unang nadiskubrihan sa driver ni Bise Gob. Agnes Magpale ang rota. Matod sa bise gobernador, dako kinig alibyo sa grabeng traffic sa Liloan, Consolacion ug Mandaue area.

Si Gob. Hilario Davide III mipahibalo nga ang bag-ong diversion road kabahin sa Greenway Link Project nga gigahinan og pondo sa nasudnong kagamhanan. Sigun sa gobernador, padayon silang mangita og dugang alternati­bong mga agi-anan paingon sa mga lagyo ug hilit nga mga dapit sa probinsiya. (AZDL)