2 nang patay sa Japanese encephalitis sukad 2016

DUHA na ang kompirmadong patay sa Sugbo tungod sa sakit nga Japanese Encephalitis Virus (JEV) sukad nitumaw kining maong sakit niadtong 2015 dinhi sa Sugbo.

Ang maong sakit nga susama sa dengue, nakatala na og walo ka mga biktima sa Sugbo sukad niadtong 2015.

Matod sa pangu sa Regional Epidemiology and Surveillance Unit (RESU) 7, Dr. Shelbay Blanco, nga duha ang mga kaso nga natala niadtong 2015, lima sa 2016 ug usa karong tuiga.

Ang mga natala nga patay tungod sa maong sakit niadtong 2016.

Gibutyag usab ni Blanco nga lima ka buwan ug 9-anyos ang pangedaron sa mga nangamatay apan nagdumili siya sa paghatag sa detalye kon taga diin kini.

Base sa datus sa RESU 7, anaa sa lima ka buwan ngadto sa 15-anyos ang pangedaron sa mga biktima sa maong makamatay nga sakit.

Matod sa JEV coordinator sa Department of Health (DOH) 7 nga si Dr. Van Phillip Baton nga ang mga nagdala nga lamok niini sa tawo gitawag nga culex mosquito.

Gikan ang kagaw sa hayop, diin human mapaaki sa lamok ang hayop, gidala niini ang kagaw ngadto sa tawo. (HBL)