2 ka parking lots way permit; Osmeña mipadalag suwat

PASIRAD-AN ni Mayor Tomas Osmeña ang duha ka parking lot nga nag-operate sa Cebu IT Park kon di siya matagbaw sa rason nganong nagpadayon ang ilang negusyo bisan kon way business permit.

Ang mayor, kinsa nakadawat og daghang reklamo gumikan sa kadako sa gipangayo nga parking fee sa mga motorsiklo sulod sa IT Park, nibutyag nga iya nang gipadad-an og show cause order ang operator sa duha ka mga parking area nganong di sila angay sirad-an bisan kon wala sila mobayad og buhis sa City Government.

“Despite charging P50, two parking lots in IT park pay no taxes and have no business permits. Show cause orders have been sent and unless they have a very good reason, closure is imminent,” tipik sa post ni Osmeña sa iyang Facebook page.

Si Atty. Jeanette Japzon, corporate communications supervisor sa Ayala Land Inc. sa Cebu nga maoy developer sa IT Park, nagkanayon nga wala sila makadawat og show cause order sanglit ang parking lot gipadagan sa third party o tag-iya sa yuta.

Ang mga motorsiklo nga moparada sulod sa IT Park pangayuan og P50 nga parking fee sulod sa unang upat ka oras ug laing tag P10 nga mosunod nga mga takna.

Ang maong mga panghitabo ug reklamo sa mga motorista hilabi na ang mga nagtrabaho sa business process outsourcing (BPO) o mas naila nga call centers maoy nipiyait sa kamahal sa bayranan.

Ilang gireklamo sanglit bi­san kon adunay mga parking area sulod sa mga building nga ilang gitrabahoan, di gihapon sila maka-park sanglit ang adunay parking slot kadto rang adunay mga dagko og ranggo sa ilang kompaniya.

Himuong parking lot

Samtang nipadala na og pormal nga komunikasyon si Osmeña ngadto kang Gobernador Hilario Davide aron himuon nga kasamtangang parking lot ang yuta sa Kapitolyo nga nahimutang kasikbit sa IT Park.

Uyon si Davide nga ipagamit ang usa sa mga luna sa Probinsiya nga anaa duol sa IT Park isip parking lot sa mga call center agent ug ubang mga tawo nga dunay tuyo sa dapit.

Giulan og bagulbol ug reklamo sa social media ang hilabihan ka mahal nga parking fee sa IT Park.

“My husband pays P80/day to cover his full 8-9 hr shift. That’s already P1,600 to P2,000 a month just for parking. Sakit sa budget,” niingon ang Facebook user nga si Ainjeliz de la Torre.

Dugang niya, “..sa una, dako na ang P100 na daily budget. Karon kay P200 na tungod lang sa parking. Nag-save og gasto sa pagkaon pero sa parking ra diay maadto ang gasto. Wa gyud pulos.”

Subay niini, ang mayor ni­hangyo sa Kapitolyo nga magamit ang luna nga anaa atubangan sa IT Park ug nag-atubang sa Honda Motors aron himuon nga parking lot.

Dihang gi-share sa mayor ang kopya sa suwat nga iyang gipadala kang Davide sa iyang social media account, daghan ang nihangop niini.

Giangkon ni Davide nga wa pa niya mabasa ang suwat ni Osmeña apan nagkahinabi na silang duha sa telepono labot niini ug uyon siya sa hangyo sa mayor. (PAC/AZDL)