PRO 7 moimbestigar ni Dong

MOPADAYON ang Police Regional Office (PRO) 7 sa pag-imbestigar kang Kenneth Dong nga usa sa mga gitumbok nga nagpalusot sa kapin 600 kilos nga gi­tuohang shabu sa Bureau of Customs (BOC) sa kaulohan gikan sa China, bisan pa man nga duna kini mga higala nga tag-as nga opi­syal sa gobiyerno.

Una nang nabaniog sa kaulohan nga ang usa sa gitumbok nga nagpalusot sa kapin sa 600 kilos nga gituohang shabu nga si Kenneth Dong higala sa pipila ka mga magbabalaod.

Ning bag-o lang, giingong suod usab sila nga higala ni Presi­dential Assistant for the Visayas Michael Dino nunot ilang pagka negosyante dinhi sa Sugbo.

Apan si Chief Supt. Jose Mario Espino, direktor sa PRO 7, human masayod gikan sa mga tigbalita labot sa giingong relasyon ni Secretary Dino, iyang gimandoan ang Regional Intelligence Division sa pagsusi niini.

Ug ang resulta, matod sa Espino, dili kaila o managhila ang duha apan iyang gipasalig nga dili kini makapugong ug makaapekto sa ilang himuon nga imbestigasyon.

“I immediately asked R2 9 (Intelligence Division) to verify that information. I turned out that there is no definite link whatsoever or relationship that they are friends, Kenneth Dong and Secretary Dino,” matod ni Espino.

Giangkon sa heneral nga sa pagkakaron wala pa nila hingpit nga masugdi ang imbestigasyon ni Dong apan nanguha na sila og mga impormasyon sa iyang mga negosyo dinhi sa Sugbo lakip na kon kinsa pa ang iyang mga higala.

Usa sa mga nakuha nga ka­sayuran sa kapulisan nga ang maong Sugboanong negosyante nanag-iya og mga balay patiga­yon sama sa imnanan nga maoy target karon sa ilang pakisusi kon duna pa bay lain niini.

Human miulbo ang isyu labot sa palusot sa Bureau of Customs, gipahibawo dayon ni Espino nga ilang natuki atol sa Regional Law Enforcement Coordinating Committee meeting uban ang mga opisyal sa BOC.

Wala matod pa makadawat og report ang mga opisyal sa maong ahensya nga dunay gipalusot nga drugas sa mga pantalan dinhi sa Sugbo gikan sa ubang mga nasod dungan sa pasalig niini ngadto sa kapulisan nga dili kini mahitabo.

Ikaduha ang Sugbo sa labing dakong pantalan lukop nasod diin daghan usab nga mga kargo nga idunggo gikan sa mga silingang nasod sa Asya apan, matod sa BOC, ang tanan mahimo ra nilang ma-monitor.