Ormoc City nangayo og hinabang

NANGAYO og hinabang si Ormoc City Mayor Richard Gomez sa kagamhanan sa lalawigan sa Sugbo human maapektuhi ang ilang siyuad sa kusog nga linog nga nitay-og niadtong Hulyo 6.

Ang aktor nga nahimong pulitiko, personal nga nipaabot sa iyang hangyo dihang nag-courtesy call si Gobernador Hilario Davide III niadtong Miyerkules human nitunol og P1 milyon nga tseke ngadto sa mga opisyal sa lungsod sa Kananga, Leyte nga labing apektado sa 6.5 magnitude nga linog.

Ang gobernador namahayag sa sinugdanan nagtuo siya nga wa maapektuhi ang Ormoc.

“But si Mayor Gomez told me nga dunay mga affected mountain barangays sa Ormoc in fact mga 2,000 at least ka fami­lies ang displaced,” matod ni Davide.

Iyang giingnan si Gomez nga motabang ang lalawigan sa Sugbo sa Ormoc apan mananghid una siya sa Provincial Board.

Si Gomez niingon ang mada­wat nila nga hinabang gikan sa Sugbo gamiton sa nagpadayon nga recovery ug rehabilitasyon sa mga pamilya nga nawad-an og kapuy-an human maguba sa linog.

Matod niya ang City Govern­ment sa Ormoc ang modawat sa hinabang apan, usa ka non-government organization ang modumala sa pundo ug mopatuman sa proyekto alang sa transparency. (SCG)