Davide mihangyo sa SC

GISUGYOT ni Gobernador Hilario Davide III nga angay hatagan og gahom sa Korte Suprema ang mga executive judge sa mga Regional Trial Court nga makasud og kontrata alang sa pag-hire og mga security guard.

Si Davide nisulti niini human wala pa ma-renew sa labing taas nga hukmanan ang kontrata sa security agency kansang mga gwardya ang kanhi nagbantay sa Qimonda IT Center.

“Naa untay authority da­pat ang executive judge to enter into a contract para dili mai­ngon ana kay kon adto pa sa Manila dugay kaayo, mala­ngan,” sumala sa gobernador.

Sa kasamtangan, ang mga gwardya nga gikuha sa Kapitolyo gikan sa security agency nga maoy provider niini ang nagbantay sa Qimonda Building.

Matod sa gobernador mahinungdanon nga mabantayan ang Qimonda IT Center diin nag-opisina ang mga korte tu­ngod kay naa kini mga ebidensya sa lainlaing mga kaso.

Si Executive Judge Gilbert Moises sa Regional Trial Court branch 18 ang nihangyo ni Provincial Administrator Mark Tolentino nga magpadala og mga gwardya ang Kapitolyo ngadto sa Qimonda IT Center aron mobantay sanglit wala pa ma-renew ang kontrata sa ilang security agency nga kanhi tigbantay. (SCG)