Piniriso gipatay sa kauban sud sa jail

NAMATAY ang usa ka piniriso sa Talisay City Jail human gidunggab sa kauban niyang binilanggo gamit ang kabilya nga gitalinsan niadtong Dominggo sa buntag sulod sa Talisay City Jail sa Barangay Maghaway, dakbayan sa Talisay.

Ang namatay giila nga si Ryan Campo, 33, ulitawo, taga dalan Colis, Barangay Tabunok, sa maong siyudad, nag-atubang og kasong frustrated murder.

Samtang ang gikatahapan giila nga si Lendy Maglinte, 24, ulitawo, taga sityo Kila­wan, Barangay Tangke, nag-atubang og kasong kawat, pagpanglugos ug pagpatay.

Base sa pasiunang imbesti­gasyon, sila si Campo ug Mag­linte pulos gipahimutang sa usa ka isolation cell tungod sa kalapasan sa lagda sa prisohan.

Matod ni PO3 Junyl Ater nga ang duha adunay gilalisan sa wa pa matino nga hinungdan.

Atol sa hitabo, samtang naminaw sa misa si Campo ug nanglingkod sa bangko, niduol si Maglinte dayog dunggab gamit ang gipahaitan nga kabilya tumong sa lusong-lusong.

Daling gidala si Campo sa Talisay District Hospital, apan gideklarar sa mga mananambal nga patay nang niabot.

Nakuha gikan sa crime scene ang 12 pulgadas nga kabilya nga gigamit ni Maglinte.

Sa pagkakaron, ang mga tinugyanan sa Talisay City Jail nag-imbestigar sa hitabo kon nganong nakatinir og mahait nga hinagiban si Maglinte bisan sa kanunay nga greyhound operation. (DRT)