Pagtukod sa building ipahunong kon dan di ayuhon

Philip A. Cerojano

IPAHUNONG ni Mayor Tomas Osmeña ang nagpadayon nga construction sa taas nga edepisyo sa dalan Sikatuna, atbang sa Zapatera Elementary School sa Bry. Zapatera gumikan sa pagkagusbat sa dalan mugna sa ilang mga heavy equipment.

Si Osmeña nagkanayon nga iya nang gihatagan og direktiba si Engr. Josefa Ylanan, pangulo sa Department of Engineering and Public Works, sa pagsusi sa lugar.

Ang DEPW maoy moreko­men­dar ngadto sa Office of the Mayor sa pag-isyu og cease and desist order (CDO) ug pagkanselar sa ilang building permit.

Ang mayor nagkanayon nga kon di maayo sa kontraktor ang gubaon nga karsada sa Sikatuna, di makapadayon og tukod ang kontraktor sa maong edepisyo.

Ang construction sa maong lugar maoy gibasol sa mga re­sidente, commuters ug tag-iya ug mga pribadong sakyanan sa pagkaguba sa karsada.

Ggrabe ang baha panahon sa ting-uwan ug grabe usab ka abog panahon sa ting-init uban sa lubaklubak nga dalan.

Hinuon, giklaro sa mayor nga ang maong lugar kanunay bahaon gumikan sa kakuwang sa husto nga drainage, apan iyang gibutyag nga ang kanunay nga pag-agi sa dagko nga mga sakyanan sa kontraktor maoy hinungdan sa pag­kaguba sa karsada.