Mga drayber sa PUJ tabangan

GIHISAMA ni Mayor Tomas Osmeña sa mga tartanelya kaniadto ang mga public utility jeepney (PUJ) nga di gusto mawala tali sa paglambo sa panahon.

Si Osmeña nagkanayon nga 14 anyos siya kaniadto dihang mayor ang iyang papa nga si Sergio Osmeña Jr. diin gisupak sa mga tawo ang pagwagtang sa tartanelya sa mga national road sanglit niabot na ang mga jeep de pasaherohan.

Kagahapon, ang grupo ni Greg Perez sa Pagkakaisa ng Samahan ng mga Tsuper at Opereytor Nationwide (Piston) Cebu uban sa mga drayber nipahigayon og martsa gikan sa Fuente Osmeña paingon sa Plaza Sugbo sa City Hall.

Sila nakighinabi kang Osmeña ug gipadangat ang ilang kabalaka sa higayon nga ipatuman na ang Bus Rapid Transit (BRT) sa dakbayan nga manukad gikan sa Barangay Bulacao sa south ug Talamban sa north.

Giklaro sa mayor nga andam nga motabang ang siyudad ngadto sa mga drayber sa PUJ nga maapektuhan apan iyang gibutyag nga di siya makapaabot nga matagbaw ang tanan.

Dugang sa mayor nga andam mogahin og pundo ang City Government alang sa pagban­saybansay sa mga drayber apan wa nay labot ang mga edaran sama sa welding ug uban pa nga maoy gipangita sa abroad.

Ang lugar nga maoy agian sa BRT way padaganon nga mga PUJ hinungdan nga daghan sa mga drayber ang maapektuhan apan si Osmeña nibutyag ang downtown area diin daghan ang eskwelahan ug mall di kini malabyan sa BRT hinungdan nga nibutyag ang mayor nga mamahimo silang makapamasahero.

Matod ni Osmeña nga ang BRT maoy makahatag og alibyo kon di man hingpit nga makasulbad sa kahuot sa trapiko sa siyudad sanglit ang pasahero sa 20 ka PUJ masud ra sa usa ka bus sa BRT.

Si Konsehal Dave Tumulak, kinsa maoy gitahasan ni Osmeña sa pag-atiman sa concern sa Piston, nagkanayon nga mohimo silag dugang tapoktapok aron ilang makuha ang mga suggestion ug problema nga angay mahatagan og solusyon uban sa mga drayber didto sa City Hall. (PAC)