30 traffic enforcers ipakatap sa TEAM

MOABOT sa 30 ka mga enforcer gikan sa Traffic Enforcement Agency of Mandaue (TEAM) ang ipakatap na unya sa kapulisan sa dakbayan aron maoy mohimo og sketch kon adunay mahitabong aksidente sa kadalanan sa dakbayan.

Tuyo niini nga paspas nga makuha ang mga sakyanan nga naaksidente sa dan aron di kini makabara sa dagan sa trapiko.

Kini maoy gibutyag sa pangulo sa TEAM nga si Glenn Antigua sa dihang nahinabi sa Superbalita Cebu kagahapon.

Sumala ni Antigua nga mag­sugod ang pagpa-deploy ang Team sa mga enforcer nga gi­lang­kuban sa riders, aktibong leader, mobile, kawani sa command center ug traffic engineering kun mapirmahan na ang memorandum of agreement tali sa dakbayan ug sa PNP.

Niadtong Hulyo 11 ngadto sa 13, ang 30 ka mga kawani sa Team gipaubos ug pagbansay sa Traffic Management Unit sa Mandaue City Police Office didto sa DepEd Building Conference Hall.

Paambit ni Antigua nga dugay na nga plano ni Mayor Luigi Quisumbing ang mohimo og sketch sa traffic accident report ang mga enfocer.

“Sila na unya ang mo-sketch kun adunay bangga kay ato man sang nakita nga kuwang ang manpower sa PNP. Mao na usahay kung adunay bangga dugay kayo marespondihan kay wala silay tawo o nag-investigate pa,” matod ni Antigua.

Sigun pa niini nga mas dali nga makaresponde ang mga enforcer sa aksidente kaysa mga pulis tungod kay naa naman kini daan sa dan.

Dugang pa niini nga dali sab kini ilabi na nga nipatuman sila sa ilang “5-minutos” nga oras sa pagrespondi ug pagkuha sa nakabara sa trapiko.

Nasuta ning mantalaan gikan ni Antigua nga moabot ngadto sa 20 hangtod 25 ka ak­sidente ang nasinati sa mga k­a­dalanan sa dakbayan. (JPP)