3 patay sa rabies

Sheila C. Gravinez

TULO na ka mga tawo ang nangamatay sa rabies sa lalawigan sa Sugbo sa unang tulo ka buwan karong tuiga base sa talaan sa Animal Bite Treatment Center sa Provincial Health Office.

Samtang, 6,021 na ka mga kaso sa rabies ang natala gikan sa Enero hangtod sa Marso karong 2017, mas daghan og 101 ka mga kaso kon itandi sa susamang panahon sa miaging tuig.

Si Dominic Tagnipez, nars sa ABTC sa PHO, niingon nga wala pay apil sa ihap sa mga kaso ang ubang mga lungsod ug siyudad nga wala pa makaduso sa ilang report sa mga kaso sa rabies ug ang mga siyudad sa Sugbo, Lapu-Lapu, Mandaue, Talisay, Naga, Toledo ug Bogo nga direkta nga adto moduso sa Department of Health.

Matod niya kasagaran sa mga nangamatay sa rabies kay wala dayon magpabakuna human mapaaki og mananap sama sa iro o iring.