Developer sa NRA modonar og mga agianan

John Paul V. Pepito

USA ka pribadong developer sa dakbayan sa Mandaue ang modonar sa right-of-way sa pipila ka mga dalan sa North Reclamation Area ngadto sa kagamhanan sa dakbayan.

Kini maoy gipahibalo ni Mayor Luigi Quisumbing sa dihang nahinabi sa mga tigbalita kagahapon.

“We are in the process of accepting the donation now but we are grateful to FF Cruz and their ownership and management for continuing to be partners in the City’s development and future,” matod ni Quisumbing.

Matod sa mayor nga ang donasyon dakong tabang aron katabangan sa dakbayan nga maayo ug mamintinar ang kanhi pribadong mga dan sanglit mao kini ang labing gireklamong road sections sa dakbayan.

Dugang niya nga usa ka semana sa wa pa ang Semana Santa, nakighimamat niya ang taga FF Cruz ug nipadayag nga idonar niini ug padayag pa niini nga way gipangayo nga baylo ang dakbayan.

Ning bag-o lang, si Quisumbing nipadayag kalabot sa mga reklamong nakuha sa kagamhanan sa dakbayan nunot sa kondisyon sa mga dalan sa NRA.

Apan siya nipasabot nga sagad sa mga dalan pabiling gipanag-iya sa pribado mao nga di makagasto ang Dakbayan sa pagmentenar ug pagbuhat og tarong nga dalan niini.