Dumot gituohan nga motibo sa pagtipi sa tomboy

Flor V. Querubin

GIDUDAHAN nga dumot maoy motibo sa pagpusil patay sa usa ka tomboy samtang nagpalit og pagkaon sa usa ka karenderya gawas sa iyang gipuy-an sa barangay Pajo, Lapu-Lapu City niadtong Dominggo.

Si SP02 Allan Pantaleon sa Homicide Section sa Lapu-Lapu City Police Office (LCPO) niawhag sa mga nakakita sa pagpusil kang Kathleen Ann Barrientos, 23, sa wa mailhing mamumuno sa Purok Capricorn sa maong barangay.

Base sa imbestigasyon, adu­nay gikaistorya si Barrientos gawas sa iyang gipuy-an sa wa pa pusila.

Mga tawo sa palibot nakadungog og buto sa armas de fuego ug nahagba si Barrientos sa iyang nahimutangan.

Si Barrientos nakaangkon og samad pinusilan sa iyang tuo nga bahin sa dughan.

Ang live-in partner sa biktima nga si Rachel Bregente maoy nay nagpangayo og tabang sa mga silingan aron madala sa tambalanan si Barrientos apan gideklarar nga dead-on-arrival (DOA).

Sigun sa mga nakakita nga namatikdan nang daan ang gunman nga nagbahasbahas sa maong dapit saw a pa ang hitabo.

Sa gihimong pagsukit-sukit sa mga imbestigador, adunay nasilo kang Barrientos human kini giingong mibalibad sa gitanyag ngadto kaniya.