Biyudong magpari di bag-o: Palma

Sheila C. Gravinez

DI na bag-o alang sa simbahang Katoliko nga tugotan ang usa ka minyo nga lalake nga mosulod sa pagka pari.

Si Cebu Archbishop Jose Palma nibutyag nga duna siya kaila nga pari sa Congregation of the Carmelite Order (Ocarm) nga minyo, apan namatay ang asawa ug nahimong professionals ang mga anak nga nisulod pagka pari ug naordinahan.

Ang arsobispo namulong niini human si Pope Francis bukas sa posibilidad nga modawat og mga minyo nga lalake tungod sa kanihit sa mga pari sa simbahang Romano Katoliko sa ubang dapit sa kalibotan.

Ang Santo Papa nga nahinabi sa mantalaan sa Germany, Die Zeit, niingon nga ang mga minyo nga lalake mahimo maordinahan isip mga pari sa mga dapit diin nagkuwang ang mga pari.

“We must consider if viri probati could be a possibility. If so, we would need to determine what duties they could undertake, for example, in remote communities,” matod ni Pope Francis sa maong interview nga namantala sa website sa CNN.

Ang viri probati, Latin nga pinulogan nga nagpasabot og minyo nga lalake nga dunay maayong buhat ug moralidad sa katilingban.

Matod ni Palma nga dili na makapakugang ang pagdawat sa mga minyo nga lalake sa pagka pari, apan dali niya giklaro nga kinahanglan mosubay sa insakto nga regulasyon ang pagdawat nila.

“Like the service to the church is for the good of the community and not in a way neglect what use to be his family obligations,” dugang sa arsobispo.

Si Palma, maoy nangu sa kasaulogan sa unang kapistahan sa kapilya ni Señor San Jose, bana ni Maria, sud sa Archbishop’s Residente kagahapon nga natumong usab sa ika 67 nga kasumaran sa iyang adlaw nga natawhan.

Sa iyang wali, iyang gilakbitan ang pagpalabang sa mga kongresista sa balaudnon nga magbalik sa silot kamatayon.

Nasagmuyo siya kay kasagaran sa mga magbabalaod nga nibotar pabor sa balaudnon kay mga Katoliko ug ang balaudnon napalabang atol sa Miyerkules sa Badlis o ang pagsugod sa Kwaresma.

Apan siya masaligon nga duna pay mahitabo nga kausaban kon ang mga tawo dunay hugot nga pagtuo sama ni San Jose.