Todiño: Way imperno

Junhan B. Todiño

MIMUGNA og kabalaka og kisaw sa komunidad sa Katoliko ang ulahing pamahayag ni Pope Francis bahin sa imperno.

Sa miaging semana, gi-interbyu si Pope Francis sa iyang suod nga higala, Eugenio Scalfari, usa ka atheist o dili motuo sa Ginoo.

Ang interbyu gipatik sa nag-unang pamantalaan sa Vatican ug gipublikar usab sa mga newspaper ug online news sa mga dagkong dapit sa kalibutan.

Gikutlo si Pope Francis nga nagkanayon “walay imperno” ug kadtong “dautan nga tawo” kon dili makapangayo og pasaylo “mahanaw lamang kini.”

Dali ra usab gibakwi sa Vatican ang pamahayag ni Pope Francis ug gipasabot niini nga na-misquote lamang ang Santo Papa.

Kon nuntan nato ang pamahayag ni Pope Francis, mahimong insakto siya ug mahimong sayop sab. Nganong man?

Pagkakaron, kon basihan nato ang Bibliya, wala pay gisilotan ngadto sa imperno.

Human mamatay ang tawo, mobalik kini sa iyang gigikanan.

“Ug giumol ni Jehova nga Dios ang tawo gikan sa abog sa yuta, ug gihuypan niya sa mga buho sa iyang ilong sa gininhawa sa kinabuhi, ug ang tawo nahimong kalag nga may kinabuhi,” Genesis 2:7

Ecclesiastes 12:7 “Ug ang abug mobalik nganhi sa yuta ingon sa kaniadto, ug ang espiritu. Sa laktod, kon mamatay ang tawo mobalik ang lawas ngadto sa abo o yuta ug ang espiritu sa kinabuhi mobalik ngadto sa Ginoo. Magpabilin ang patay dinhi sa kalibutan hangtod sa ika-duhang pagbalik ni Hesu Kristo.

Job 14:12 “Mao usab ang tawo mamatay ug dili na mobalik: Hangtud nga mawala ang kalangitan, sila dili na manghigmata, Dili usab sila mapukaw sa ilang pagkatulog.”

Magdala ang Dios og silot alang sa mga dautan, ug ganti alang sa mga matarung sa iyang pagbalik sa kalibutan.

Revelation 11:18 “Ang kanasuran nangapungot, apan miabut ang imong kapungot, ug ang panahon alang sa pagpanghukom sa mga patay, ug alang sa pagpanghatag ug ganti ngadto sa imong mga ulipon-- mga profeta ug mga balaan, ug mga nanagkahadlok sa imong ngalan, mga gagmay ug mga dagku, ug alang sa paglaglag sa mga manglalaglag sa yuta.”

Pagkakaron, tataw nga wala pay imperno kay giandam lamang kini alang sa yawa ug mga tawong daotan ingon nga silot sa ilang pagpakasala.

2 Peter 3:10 “Apan ang adlaw sa Ginoo moabut sama sa usa ka kawatan, ug unya ang mga langit mawagtang uban sa dakung dinagook, ug ang mga kasugdanan sa kalibutan mangatunaw sa hilabihang kainit, ug pagasunogon ang yuta ug ang mga buhat nga ania niini.”

Busa, insakto si Pope Francis nga walay imperno – kana, sa pagkakaron kay wala pa man usab mobalik ang Ginoo aron sa pagsilot sa mga daotan.

Apan, sayop ang pahayag nga “mahanaw” lamang ang makasasala. Klaro sa Bibliya pagasilotan gayud ang makasasala ug “ang silot sa sala mao ang kamatayon.”

Kon walay nasilotan sa imperno karon, wala say gigantihan sa langit gawas nila ni Moses, Enoch ug Elijah.

Lisod man pud tuohan kon modiretso na sa langit ang matarung nga tawo nga namatay. Unsa man diay ang tuyo sa Ginoo sa iyang ika-duhang pag-anhi sa kalibutan kon tua na sa langit ang mga matarungon, kinsa pa man iyang luwason?

Gawas pa, kon tua na sa langit ang mga matarung, dili kaha sila magkaguol, imbes lonlon kalipay, nga magsud-ong sa ilang mahal sa kinabuhi nga naglisod dinhi sa kalibutan.