Todino: Body camera alang sa mga pulis

Junhan B. Todiño

TODO suporta na ba gyud kaha ning gipakita sa Kapitolyo pagsangkap sa kapolisan og body camera ug movable checkpoint shelter?

Basi sa iyang pamahayag, sangkapan ni Gobernador Yevgeny Emano ang tanang police station sa probinsiya og body camera aron magamit kini sa ilang operasiyon batok sa ginadiling drugas.

Importanti ang maong camera aron madokumento ug ma-rekord sa kapolisan kon gipasubay ba nila sa insaktong pamaagi ilang operasiyon.

Gihimo na kini sa uban kapolisan sa nasod, medyo ulahi lang ang Misamis Oriental.

Kon tiunay ug seryoso pa gyud unta ang PNP ug ang gobiyerno sa ilang kampaniya batok sa drugas, kaniadto pa gisuplayan na unta nila og insaktong kahimanan atong kapolisan.

Ang labing batakang kahimanan sa pagprotihir sa mga polis mao kining armas, police helmet, bulletproof vest, mga accessories sa armas uban niini ang anti-glare polarizer night vision glasses driver night vision glasses ug uban pa.

Pila ra man ka mga pulis ang adunay kompleto nga ekipo?

Duna bay mga K-9 atong mga pulis nga magamit kanunay nila sa operasiyon?

Kanunay bang gibansay atong kapulisan o nipahigayon pa sila og special training alang sa maong misyon?

Gikan sa intelligence fund kuhaon sa gobernador ang pundo pagpalit og body camera samtang gikan usab sa Provincial Disaster Risk Reduction and Management ang kwarta nga gamiton pagpalit og mga transportable checkpoint shelters.

Tingali, mas maayo moparayeg si Emano ngadto sa iyang mga kaalyadong kongresista sa Misamis Oriental ug mangayo og dugang pundo alang sa mga ekipo sa kapolisan.

Kompletohan nato sila og gamit aron mas epektibo ang kampaniya ug operasiyon sa kapolisan batok sa kriminalidad.

Kon sangkap na sa ekipo atong kapulisan, dili na sila makapangulipas nganong lisod pakgangon kining problema sa drugas.

Paingon na ba ka kini sa pagmodernisar nato sa operasiyon sa kapolisan.

Kon sundon nato ang uban dapit, makita ug makompoarar nato ang dakong kakuwangon pa sa probinsiya.

Sa panahon karon, dili na unta lisod ang pagtultol kon dunay mahitabo nga kremin.

Kana kon, lagi, moderno ug sangkap ang probinsya sa panginahanglan sa operasiyon sa kapolisan.

Ang pangutana, duna bay CCTV camera ang strategic areas sa mga munisipyo ug mga dagkong karsada sa probinsya. Duna bay mga sakyanan ang kapolisan nga magamit sa paggukod sa mga kreminal?

Kon ang mga sindikatong mga criminal sangkap sa modernong ekipo ug naggamit sa mas kusog nga mga sakyanan, unsay may dag-anan sa atong kapolisan?