Todino: Nagpabaya nga mga drayber

Junhan B. Todiño

ANG inisyal nga imbestigasiyon sa kapolisan mao nga nakatulog ang drayber sa pickup truck ug maoy hinungdan nga gidaro niini ang walo ka mga motorsiklo nga nakaparada atbang sa Del Monte sa barangay Bugo sa miaging adlaw.

Matod sa report ni Stephanie V. Berganio sa Sun.Star Superbalita mag-atubang og kasong reckless imprudence resulting to physical injury ug multiple damaged of property ang drayber. Wa pa hinganli ang responsabli.
Kon paladman nato ang imbestigasiyon, tingali masuta gyud ang tiunay nga hinungdan sa maong aksidenti.

Unsa kaha kon mga tawo pa kadtong naglinya daplin sa karsada? Pila kaha ka mga kinabuhi ang nakalas niadtong higayona?

May imbestigasiyon o wala, tataw nga dunay pagpabaya sa drayber niining maong nahitabo. Ngano man?

Nuntan ta nga dunay mechanical problem sa sakyanan. Kon responsabli ta nga drayber, tamdan nato ang regular nga maintenance sa sakyanan aron masuta kon maayo ba o dili ang kondisiyon niini.

Kon nakatug ang drayber, nan, problema na kay nganong nagmaniho man nga wala sa maayong buot. Kon naka-inom ug hubog ang drayber, mas dako na nga problema.

Basin kaha nag text-text pud ning drayber.

Bisan unsaon natog kwenta, kining nga hinungdan sa aksidenti sa dalan mapasangil ra gyud nato ngadto sa pagpabaya sa drayber – tungod sa pagkadanghag, paugat pagmaniho, walay pagtagad sa balaod sa trapiko, pagpunay og text, gamit og cellphone, pagkahubog, pagkahikatulog.

Bisan na gani sa mga pampublikong mga sakyanan sama sa mga bus de pasaheroan PUJ o bisan motorela, anaa kining pagpabaya sa mga drayber.

Hinumdoman nato, kining sakyanan, bisan unsa ka gamay sama sa biseklita o motorsiklo mahimo kanang makamatay nga hinagiban kon dili nato gamiton sa insaktong paagi.

Daghang mga aksidenti sa kadalanan nga malikayan unta kon nahibaw pa unta sa ilang responsabilidad ang mga drayber.

Ambot nganong maglisod gyud paggukod atong gobiyerno batok niining mga bulogayon nga mga drayber, ug mga depektoso nga mga sakyanan.

Mas maayo pabug-atan ning silot sa mga drayber nga maka-disgrasya aron magmatngon na gyud sila sa pagmaniho.

Unta, tutukan kini sa atong mga magbabalaod ang paghigpit sa pagkuha og lisensiya, pagpabug-at sa silot niadtong nagpabaya nga drayber, ug pagwagtang niining mga depektoso nga mga sakyanan.