Todino: Abilidad luyo sa mga parol

Junhan B. Todiño

UNSA may importanting mensahi niining tinuig nga pagpanghimo ug pagbaligya og parol o lantern sa mga binilanggo sa Misamis Oriental Pronvicial Jail panahon sa Pasko.

Nagpasabot ba kini nga dunay kahibalo o skills atong kaigsuonang mga binilanggo ug maayo ang pagpadagan sa administrasiyon sa provincial jail.

Gawas sa ilang abilidad, mas polido ang ilang produkto kon itandi nato sa gipangbaligya sa tindahan. Nagpasabot ba kini nga mas hanas gayud kining mga piniriso sa ilang trabaho?

Kon nuntan nato kining duha ka mga punto, way katarungan nga dili moasenso ug molambo ang management sa provincial jail ug ang mga piniriso mismo.

Apan, kon limitado ang program, bisan unsa ka hanas ug kaepektibo sa program nga gipatuman sa administrador, walay luna o minus gayud ang pag-uswag ug pag-abante alang sa tiunay nga kalamboan – nagpasabot nga dili gayud dako ang pag-asenso sa programa.

Ngano man?

Hinuon matag tuig gihimo kini sa provincial jail ug panahon sa kapaskohan mokita gayud ang prisohan og nilibo ka pesos.

Basi sa report, si provincial wardern Dominador Tagarda niinong moabot ngadto sa P600,000 ang ilang kita sa miaging tuig.

Gikan sa maong income, ang mga piniriso makabahin og 60 porsiento.

Apan, kontento nalang ba kita sa maong programa.

Nganong di man nato gamiton sa hingpit ang katakos ug maayong pamunoan sa provincial jail alang sa mas lapad ug mas maluntaron nga programa.

Gibuhat na sa ubang mga prisohan sama dinhi sa provincial jail ang paghimog programa nga maka-income ang mga piniriso.

Ang nakalahi sa ubang prisohan, mao nga mas luag ang ilang lugar aron makalihok o makahimo sila og daghang kakitaan.

Ang Misamis Oriental Provincial Jail nahimutang mismo sa sentro sa dakbayan.

Gawas nga gamay ang iyang lugar, dili na gyud haom alang sa iyang nahimutangan karon.

Tingali kon mahinayon kining pagbalhin sa provincial jail ngadto sa upat ka hektaryang gidak-on sa luna sa lungsod sa Initao, mas molambo pa pag-ayo kining abilidad sa atong mga piniriso.

Mas dako ang paglaom ug hayag ang kaugmaon sa mga piniriso sa mas luag ug dako nga pasilidad diin sila maka-praktis gyud sa ilang nahibaloan nga mga proyekto.

Kining pagpabaligya og parol panahon sa Pasko, hinaut nga himuon kining salamin sa gobiyerno pagduso og mas lapad pa nga programa sa mga binilanggo aron mahimo silang mas produktibo ug dalaygon nga sakop sa komunidad sa ilang paggawas unya sa bilanggoan.

Kanus-a kaha matuman kining pag-relocate sa provincial jail. Nganong dugay man kaayo ang pag-abante sa plano. Dili nato i-hostage ang maayong abilidad sa mga piniriso pinaagi sa paglangaylangay sa program nga makaayo unta kanila. Panaminan unta sa Kapitolyo kon unsa kapaspas ug pulido ang paghimo og parola sa mga piniriso ang ilang pagpatuman usab sa pagbalhin sa provincial jail.