Todino: Marijuana

Junhan B. Todiño

WALAY tinguha ang Senado nga ipasar ang balaodnon nga mag-ila sa marijuana nga tambal ug pwede nang gamiton alang niadtong nagkinahanglan sa pag-alibyo sa ilang balatian.

Si Senador Vicente Sotto II niinsister ang medical marijuana bill nagdasig lamang sa paghimo nga legal ang paggamit sa marijuana ug nasupak kini sa gipirmahang kauyonan sa Pilipinas uban sa United Nations.

Sa ubang bahin sa kalibutan, labi na sa pipila ka mga estado sa Amerika, gihimong legal ang paggamit og marijuana.

Sama sa gipaabot sa uban, dunay daghang “apan” ug bentahan ang pagduso sa medical marijuana bill.

Sa miaging semana, giaprobahan ang draft report sa Philippine Compassionate Medical Cannabis Act sa House health committee.

Ang nagduso sa balaodnon nga si Kongresista Rodolfo Albano III niingon daghang mga pagtuon nga magpakita sa kaepektibo sa marijuana alang sa epileptic seizures, pain management, arthritis ug sa ubang mga sakit.

Pero, atong hinumdoman nga sa Comprehensive Dangerous Drugs Act of 2002, giila gayud na ang marijuana nga ilegal nga druga.

Tingali, kinahanglan moinsister gayud ta pagduso sa marijuana bill kon wala na gayud lain pang tambal sa nahisgutang mga balatian.

Ang paggamit sa marijuana, usa lamang kana sa mga alternatibong tambal.

Nasayod sab ang kadaghanan nga grabe ang epekto aning marijuana diha sa lawas sa tawo. Daghang naadik niining paggamit sa marijuana.

Kon “simbako” molusot gayud ang balaodnon, ug pirmahan usab sa presidente, mapaabot nato nga mosiaw gayud pag-ayo kining paggamit sa marijuana.

Kay bisan mangatarungan ta nga higpiton gayud ang pag-regulate sa tambal, daghang mga paagi nga malutsan gihapon ang gobiyerno.

Karon lang gani, nga illegal pa kining paggamit sa marijuana, wala man gani hingpit masumpo sa atong kapolisan.

Aron di na unta masayang kining oras sa atong mga magbabalod, nganong dili man sila mopasar og balaodnon nga maggahin og dugang pundo alang sa mga ahensiya sa gobiyerno nga nag-experimento ug naghimog mga research sa tambal.

Dili sulbad ang paghimo sa hiwi nga tul-id aron matul-id ang hiwi.