Todino: 911 sa CDO

Junhan B. Todiño

WA TAY question aning tinguha sa City Disaster Risk Reduction and Management Department pagpalambo pa sa ilang emergency response ug crime prevention program pinaagi sa paggamit og emergency hotline.

Matod ni Allan Porcadilla, ang officer-in-charge sa maong departamento, sundon nila ang systema sa Davao City’s Central Communications and Emergency Response Center kon Central 911.

Ang prayoridad sa program mao ang pagluwas og kinabuhi, ilabi na panahon sa emergency sama sa kalamidad.

Ang buot mopahimus sa maong serbisyo pwede mogamit sa ilang cellphone o landline aron ma kontak ug ma-report dayon sa departamento.

Importanti kining programaha labi na sa sitwasiyon sa atong dakbayan nga kusog ang pag-uswag.

Ug walay katarungan ang administrasyon, bisan ang pribadong sector nga dili mosuporta niini kon ugaling magkinahanglan pa ang departamento ug dugang ayuda.

Ang dakong pangutana lang kon unsa ka dali ang pagrespondi unya ngadto sa mga tawo nga nagkinahanglan og dinaliang suporta o tabang.

Kay bisan sangkap pa unya sa moderno nga ekipo ang departamento pagtubag sa mga alarma apan bagal gihapon ang ilang pagrespondi, segurado nga makokmpromiso ang ilang tahas ngadto sa publiko.

Kining klase nga programa gud, dili na masukod kon unsa ka dali ang pagdawat og mensahi gikan sa nagtawag, apan kon unsa ka paspas ang pagtubag sa panginahanglan.

Dugang pa niani, aron kompiyansa gyud ang publiko sa maong programa, seguradohon nato nga sangkap kini sa mga kahimanan.

Basin baya, pipila lang ang mga emergency vehicle nga magamit nato niini.

Kon simbako magsunod-sunod ang alarma o tawag nga nangayog tabang, duna bay igong mga sakyanan nga madispatsar nato ngadto sa mga dapit.

Kon sundon nato ang sistema sa Davao, nan, kinahanglan gyud sangkapan nato og igong mga kahimanan, personahi ug ekipo ang atong emergency program.

Mahimo lamang nga epektibo kining programaha kon dunay sinseridad ang tigpatuman, nagpasabot dili salingkapaw ang panglantaw sa unahan apan lig-on ug dunay determinasiyon.