Todino: Super highway

Junhan B. TodiƱo

NAGHINAMHINAM na ang katawhan maablihan kining 12.77 ka kilometro nga coastal superhighway nagdugtong sa Barangay Gusa ug Puntod.

Mga 93 porsiento na kompleto ang P4 bilyones nga proyekto gisugdan niadtong 2012.

Kon maresolbar na kining road-right-of-way issue, segurado maablihan na sa publiko ang karsada sunod tuig.

Ang nakahatag og attraction sa highway mao kining 2.54 ka kilometro nga baywalk diin pwede unya magsuroysuroy ug magpahangin ang mga tawo.

Sigurado na moluag na usab ang trapiko sa C.M Recto Avenue kay dili na mosulod ang mga bus de pasaheroan gikan sa Bukidnon ug Butuan sa ilang naandang rota.

Duna pay phase sa proyekto diin ilangkob na unya ang Bugo sa coastal road.

Ang dili nato maseguro mao nga kon magamit ba gyud kining super highway sa iyang tiunay nga katuyoan.

Timan-an nato, dunay daghang mga road project, apil na niini ang pagpalapad sa karsada. Apan, unsay nahitabo pagkahuman sa proyekto?
Sagad niini, gigamit nga parkinganan sa mga pribadong sakyanan. Wa masulbad ang hapsay nga daloy sa trapiko, naghuot gihapon ang karsada.
Nganong ingon niini? Resulta kana sa kakuwang og political will sa mga namunoan sa dakbayan.

Atong malantawan nga motakod gihapon kining problemaha sa umaabot nga super highway kon dili mag-nistrikto pagpatuman sa balaod ang gobiyerno.
Naa tuod kining alternate road pero huot ug nabalda gihapon ang dagan sa mga sakyanan gumikan unya sa mga nagparada daplin sa karsada.

Ang gusto natong mahitabo mao nga ideklarar gyud nga no-parking zone kining mga highway.

Nahibaw ta nga usa sa hinungdan sa aksidenti mao kining mga sakyanan nga nagparada sa karsada.

Hinaut nga dili mausik kining mga road project sa gobiyerno. Dili unta pipila lang ang makapahimus apan mayoriya sa publiko ang mabulahan.

Kay kon dili magmatinumanon ang gobiyerno sa pagpagamit sa mga proyekto niini subay sa iyang insaktong katuyoan, kining super highway mahimo lamang kining super parking area unya.