Todino: Nahinog na si Parojinog

Junhan B. Todiño

MAISIP ba nato nga na-neutralize na sa awtoridad ang Ozamiz City gikan sa illegal nga drugas human sa dugoong pagronda sa Criminal Investigation and Detention Group ug Philippine National Police ang mga Parojinog niadtong Dominggo sa kaadlawon?

Napuhag na ba gayud ang iyang galamay ug naputol na ang ilang sanga busa angay mag-selebrar ang awtoridad?

Mominus na ba kaha ang suliran sa drugas human napatay sila si Mayor Reynaldo Parojinog uban sa iyang asawa nga si Susan ug igsuon nga si Provincial Board Member Octavio Parojinog ug ang 12 nila ka mga kauban?

Timan-an nato, dunay 51 ka mga barangay ang Ozamiz City ug mayoriya niining mga kapitan kaalyado sa mga Parojinog.

Ug atong tan-awon ang ulahing report sa Philippine Drug Enforcement Agency nisaka ang gidaghanon sa mga barangay nga apektado gihapon sa illegal nga drugas.

Tiaw mo, sa 42,036 ka mga barangay tibuok nasod, 20,872 niini apektado gihapon sa drugas.

Hulaton nato, unsay sunod mahitabo kong duna bay mga barangay kapitan ang mosunod sa gidangatan nila ni Parojinog.

Karon pa lang, mas maayo motahan na sa ilang kaugalingong kadtong mga kaabay ug kakunsabo sa mga Parojinog.

Kay mosugot ta o dili, matultolan ug mailhan ra gihapon ni sila.
Unta manakod ning 'ngilngig' nga kampaniya sa CIDG ug PNP dire sa Cagayan de Oro kay hangtod baya karon wala pa gyud ta makakita og "dagkong isda" nga gitumba.

Sa dugayng panahon, wala matago sa tibuok Pilipinas ang imahen sa mga Parojinog gikan sa ilang pagkalambigit sa nagkadaiyang kreminalidad.

Apan, karon lang gyud, nasugamak ang mga Parojinog sa kamot sa balaod ubos sa administrasiyon ni Presidenti Duterte.

Gihulagway sila nga “untouchable” taliwa sa daghang illegal nga kalihukan ilang gipasiugdahan.

Ang Parojinog naa sa narco-list nga gipakita kaniadto ni Duterte.
Daghan nang higayon sa pagsulay og raid sa ilang panimay, apan, matod sa kadagkoan sa kapolisan kanunay matiktikan ilang plano.

Sa dugayng panahon nilang pamunoan sa gobiyerno naka-establisar na sila ko koneksiyon sa kapolisan ug sa mga taas og posisyon sa Malacanang ug Kongreso, bisan na gani sa judiciary o korte.

Busa, dili ikatingala nga milahotay pa sila og taas nga panahon bisan sa kusganong kampaniya ni Duterte batok sa illegal nilang kalihukan.

Apan, karon nahinog na ang panahon sa mga Parojinog.

Naa pay mga mayor ug ubang opisyal sa gobiyerno ang nagpadayon pa sa ilang illegal nga kalihukan sa drugas.

Panamini ninyo ang nahitabo ni Parojinog ug Albuera Mayor Rolando Espinosa Sr.