Todino: Pasalig ni Emano sa mag-uuma

Junhan B. Todiño

USA sa mga programa ni Agriculture Secretary Emmanuel Piñol mao kining self-sufficiency sa mga nag-unang produkto sa agrikultura.

Nagpasabot kini nga tinguhaon sa gobyerno nga dunay igong suplay sa produkto agrikultura ang nasod aron dili na magkinahanglan mopalit pa sa gawas.

Kinahanglan ni ang program labi na karon nagsaka ang gidaghanon sa mga tawo unya kanunay tang duawon og kalamidad nga usahay molumos sa atong kaumahan.

Pinaagi aning programaha mahimong self-sufficient atong nasod ug dili na mabalaka sa pagpangita og pagkaon.

Si Governor Yevgeny Emano sa Misamis Oriental, maoy usa sa mga gobernador nga nisanong sa maong panawagan.

Niadtong Hunyo nakigtagbo si Emano sa mga mag-uuma aron hisgutan ang ilang plano pagseguro nga dunay igong suplay ang probinsya.

Isip usa ka agriculturist, dali ra nga masabtan ni Emano ang panginahanglan ug yangongo sa mga mag-uuma.

Gipasantop sa gobernador unsa ka-importanti ang pagmugna og long-term nga programa pagpalambo sa industriya sa agrikultura.

Matod sa gobernador dunay igong pundo ang gobiyerno sa pagtabang sa mga mag-uuma.

Sa iyang pamahayag nga “ang akong pagkagobernador dunay kinutuban, panahon na karon, kay basin lahi og priyoridad ang sunod nga gobernador” – nagpakita unsa ka sinsero ang gobernador pagtabang sa atong mga mag-uuma.

Dili lang unta kini ilimit nato sa Misamis Oriental. Ang matag local government unit dunay responsibilidad sa pagpalambo sa ilang argrikultura, labi na dinhi sa Mindanao.

Insakto si Piñol sa iyang panglantaw alang sa self-sufficiency program. Ngano man?

Kon makab-ot kining programa sa Departamento sa Agrikultura, mas daghan na unya og suplay sa produkto agrikultura ang matag probinsya ug magpasabot kana og ubos nga presyo sa mga bugas, utanon, prutas, bisan na gani poulty product sama sa manok, itlog, ug mga marine product sama sa isda.

Si Emano napasalig nga tinguhaon gyud sa iyang administrasiyon ang pagkab-ot sa good self-sufficiency program pinaagi sa paghatag og igong pundo gikan sa panudlanan sa lalawigan.

Angay natong suportahan kining tinguha sa probinsya sa Misamis Oriental kay dako kining mahatag og benipisyo sa tanang molupyo.