Todino: Usa ka tuig ni Duterte batok drugas

Junhan B. Todiño

LAHI sa ubang pangulo sa nasod, si Presidenti Rodrigo Duterte nihatag og gibug-aton sa yangongo sa kinabag-an nga naapektohan sa ilang adlaw-adlaw nga pagpanggawi.

Busa, maingon nato, malamposon ang iyang unang usa ka tuig nga pagdumala sa nasod.

Unsa man kining problema nga direktang nakaapekto sa kadaghanan.

Nasayod ta unsa ka agresibo ang administrasiyon ni Duterte sa kampaniya batok sa illegal nga droga.

Dili lang concern ang presidenti sa panglawas ug kahimsog sa mga molupyo, naglantaw usab siya sa kaugmaon sa kinabag-ang katawhan sa Pilipinas.

Ambot kinsay molalis sa daotang epekto niining illegal nga drugas.

Matag karon ug unya makadungog kita og balita bahin sa resulta sa paggamit sa ginadiling droga.

Ipha kono ang mga krimen sa imong palibot nga nahitabo gumikan sa droga?

Pila ka mga relasiyon ug pamilya ang nabungkag tungod sa droga, pila ka mga kaugmaon ang nawasak gumikan sa droga, pila ka mga trabaho, sa gobiyerno ug pribado ang nahanaw gumikan sa droga.

Daghan pang mangil-ad ug daotang epekto sa komunidad nahitabo gumikan sa drugas.

Basi sa report, 1.3 ka milyon ka mga illegal drug user ug pusher mitahan sa gobiyerno. Daghan pa ang nagtagotago ug nagpadayon sa ilang daotang bisyo.

Kinahanglan usahay ang pagsakripisyo niining tinguha sa pagtul-id sa hiwi nga dalan.

Busa dili malikayan dunay kinabuhi nga makalas sa kampaniya batok sa ilegal nga droga.

Lisod dawaton nga dili kalamposan kining P18 bilyones nga balor sa droga ug mga kagamitan nakompiskar sukad sa kampaniya sa administrasiyon batok sa droga.

Tinuod, dunay wa matagbaw sa administrasiyon ni Duterte sa iyang unang usa ka tuig.

Apan, bisan dili nato iapil ang kalamposan sa gobiyerno pagkuha og $35 milyones dolyares nga puhonan gikan sa langyawng mga kompaniya nga moabli og mga patigayon unya sa Pilipinas, ang iyang pagpakabana sa usa sa mga batakang problema sa katilingban nga mao ang droga, igo na nga makahatag nato og paglaom alang sa dugang kalamposan sa uban pang program sa gobiyerno.

Kon wala kining kampaniya batok sa ginadiling droga, unsa may kasegurohan sa kahapsay ug kalinaw sa komunidad.

Ang kahapsay ug kalinaw maoy labing important alang sa katawhan ug sa tibuok nasod.

Mag-unsa man ang daghang trabaho, maayo og inprastruktura sama sa transportasiyon, karsada, enerhiya, apan dili luwas imong kaugalingon bisan mismo diha sud sa imong panimay kay usa sa imong miyembro sa pamilya naungo sa paggamit og droga.

Maayo kay gipamugos gyud ni Duterti ang pagpukan sa problema sa drugas.
Ug gawas sa iyang maisogon nga polisiya batok sa droga, wa niya hikalimti ang ubang program pagpalambo sa nasod.