Todino: Natural nga pagkaon

Junhan B. Todiño

KON hatagan nato og gibug-aton ang pagtuon ug resulta sa medical science, nan, maayong likayan gayud nato kining mga pagkaon nga dunay mga preservatives, additives ug uban pang mga chemical.

Ug atong susihon pag-ayo, gikan sa gamay'ng tindahan ngadto na sa dagkong grocery ug department store, daghang mga canned good ug frozen products ang naka-display kon ikompara nato sa mga presko nga utanan ug prutas.

Dili lang ang World Health Organization, apan bisan ang Department of Health sa atong nasod kanunay nagpahimangno batok niining illegal nga paggamit og chemical sa pagkaon nga makadaot sa panglawas sa tawo.

Bisan sa sobsob nga pahimangno, daghan gihapon sa mga “tikasan ug pamahimuslanon” nga negosyanti ang nagpakatap niining mga produkto nga makadaot.

Karon, dili lang mga chemical atong bantayan, kay mismo ang produkto dili na orihinal, nagpasabot daghang mga peke nga produkto sa pagkaon ang gipanghimo karon.

Unsa may dag-anan sa yanong kosumidor aron mapanalipdan ilang katungod sa pagmintenar og maayong panglawas?

Wala ba kaha magkuwang atong gobiyerno pagpaniid ug pagpugong niining mga produkto nga makadaot sa pagkuyanap sa atong mga merkado?

Sama sa ubang nasod, kining problema sa manufactured food sama sa mga canned goods, lisod sulbaron.

Dili malimod nga dunay gipangsagol nga chemical sa mga canned goods ug bisan sa mga juice ug uban pang produkto.

Apan, duna kining limit nga gitugot sa gobiyerno, magpasabot nga wala niini pugngi ang mga manufacturer sa paggamit og makadaot nga sagol basta dili lang mosobra sa gitugot sa balaod.

Kana, makita gani nato bisan sa mga utanon ug prutas. Dunay mga regulated nga pesticide nga pwede nga gamiton pag-abuno ug pagpalambo sa tanom.

Unsaon man nato paglikay niini? Kon buot hunahunaon seguro kapin sa 90 porsiento sa mga baligya sa merkado nasagolan na ug mga makahilo ug makadaot nga chemical.

Ang labing luwas nga paagi mao ra gayud ang pagtanom ug pagpalambo sa imong kaugalingon nga garden o umahan alang sa imong inadlaw-adlaw nga konsumo.

Apan, malisod kana sa ubang mga tawo labi na niadtong nanimuyo sa dakbayan.

Busa dako kaayo og papel unta ang gobiyerno niining paghatag og seguridad aron maseguro atong mga pagkaon nga luwas gikan sa makahilo nga chemical.

Ang pangutana duna bay gihimo ang gobiyerno karon nga bisan nalang kaminusan unta kining paggamit og preservative mga additives sa atong mga pagkaon.

Duna nay mga manufacturing food company nga naggamit og natural nga paagi sa pagpreserba sa ilang mga produkto. Nahimo kana tungod sa ilang makugihon nga pag-research ug paningkamot aron makahimo og healthy nga produkto.

Ato lang panghinaot nga hatagan og dakong pagtagad sa gobiyerno kining pagpalambo sa organic ug natural nga mga produkto.

Unya seryoso ang gobiyerno pagpalambo sa kahimsog sa panglawas kay mao kana ang batakang panginahanglan alang sa malamboon nga komunidad.