Todino: Mangayo ta'g husay

Junhan B. Todiño

SA ULAHING press conference, gipahibaw ni Defense Secretary Delfin Lorenzana moabot ngadto sa 191 ka mga teroristang Maute ang nangamatay sa nagpadayong operasiyon sa military sa Marawi City.

Dunay 154 sab ka mga armas ang nakuha gikan sa mga terorista.

Wala pa mohatag og kompletong sumada si Lorenzana kon pila gyud ka mga sibilyan ang nangaangol ug nangamatay sa maong kagubot.

Pagkakaron, ang labing klaro sa sitwasiyon sa Marawi City mao ang ngil-ad ug dautang sangpotanan sa gipanghimo sa terorista.

Timan-an nato, sa ulahi niining tanan, ang mga sibilyan maoy labing naalaot.

Unsa may nakab-ot sa teroristang Maute sa ilang pag-ataki sa Marawi City?

Sama sa ubang bahin sa kalibutan, ang konkretong kalamposan sa mga terorista mao ra gyud ang pagbilin og kadaot sa kinabuhi, sa kabtangan ug bisan na gani kadaot sa panggobiyerno.

Mahimong makakuha sila og simpatiya sa pipila ka mga katawhan sa komunidad, apan dili gyud sila molampos sa ilang dautang plano.

Ang dakong hagit karon sa gobiyerno mao ang pag-establisar sa hinungdan ug sinugdanan niining Maute.

Gusto nato mahibaw-an kon kinsa gayud ang nagpaluyo, nag-finance, ug nagsuporta aning mga terorista.

Kon gipaluyohan sila og langyaw nga terorista, nganong nakalusot man ang daghang mga armas?

Giunsa man nila pagpuslit sa ilang mga kahimanan? Duna bay panagkonsabo sa pipila ka badlongon sa gobiyerno o military?

Dili ta mosugot nga magpakahilom lang ang gobiyerno aning kaso sa mga Maute. Kinahanglan iyagyag nila ang tanang inpormasiyon aron dili mahimong kadudahan ang ilang imbestigayon.

Kon duna may mga politiko nga nalambigit, nan, isang-at ang tukmang kaso. Kay kon dili makab-ot sa gobiyerno ang paghatod og hustiya, bisan pa mapukan nila kining Maute, pilde gihapon sila diha sa ilang kasingkasing sa katawhan.

Unya unsa man kining technical support sa Estados Unidos paggukod sa mga Maute, nga matod ni Presidente Duterte wa siya mahibawo?

Wa kahay laing motibo niini aron mapakaulawan si Duterte nga daan nang nidistansiya sa America ug mipaduol sa China ug Russia?

Mangayo ta og husay sa gobiyerno aron dili manakod kining kalihukan sa mga terorista sa atong nasod.