Frias: Angay tambalan sa Celtics

Jaime A. Frias II

ANGAY tambalan sa Boston Celtics ang 104-117 nga kapildehan nila batok sa Cleveland Cavaliers sa Game 1.

Gipakita sa Cavaliers ang ilang bangis nga preparasyon niadto diin naglisod ang Celtics sa ilang hugot nga depensa.

Nabantayan og maayo sa Cavaliers si Isaiah Thomas, diin nalimitahan lang og duha ka puntos sa unom ka minutos nabilin sa unang half.

Igo lang nihuman ang saligandong guard sa Celtics og 17 puntos sa dula apan gamay kompirar sa niaging pagpamuntos niya sa playoffs.

Naay usa ka higayon nga nalukong si Thomas sa depensa ni Kevin Love pag-switch kang Kyrie Irving.

Naa pay depensa sa Cavaliers nga mo-double team kang Thomas aron mahinay iyang buylo pagdala sa bola.

Morag nabantayan sa Cavaliers nga nakatotok ang rotasyon sa opensiba sa Celtics kang Thomas.

Gawas sa depensa sa Cavaliers, unsa kahay paagi sa Celtics pagpugong nila Lebron James ug Kevin Love.

Si James nihuman og 38 puntos, siyam ka rebounds ug pito ka assists, samtang nihatag sab si Love og 32 puntos ug 12 rebounds.

Naa sab si Tristan Thompson nga niabag og 20 puntos ug siyam ka rebounds.

Wala pa miarte og maayo si Kyrie Irving nga igo lang nibira og 11 puntos ug unom ka assists.

Dapat matambalan kini sa Celtics sa Game 2 nga diha pa sa ilang balwarte ug naa ang ilang dumadapig.

Kay sa sunod duha ka dula, matagamtaman sa Cavaliers ang homecourt advantage.