Todino: OFW Bank hapit na gyud

Junhan B. Todiño

GIHISGUTAN kini ni Presidente Duterte, isip usa sa iyang mga program, atol sa iyang unang usa ka bulan paglingkod sa Malacañang.

Unya, karon gipahibaw na gyud sa Department of Labor nga magsugod na pag-operate ang overseas Filipino worker (OFW) Bank karong Setyembre ning tuiga.

Matod ni Secretary Silvestre Bello III ang OFW Bank nga dunay authorized capital nga P3 bilyones ug subscribed capital nga P2 bilyones motanyag og P1 bilyones alang sa mga OFW nga gustong mahimong kabahin sa pagpanag-iya sa bangko.

Mao kuno ni motubag sa panginahanglan sa mga OFWs, sama sa ilang remittance ngadto sa pamilya.

Wala ni mahitabo sukad sa milabay nga mga administrasiyon nga miila man unta sa mga OFWs isip moderno nga bayani.

Usa kini ka panginahalgnan nga na-overdue na gayud pag-ayo. Dugay na kining gihandom sa mga OFWs.

Ug dili malalis, bisan wala pa nato masuta pag-ayo ang ubang benepisyo makuha sa OFW Bank, apan tataw nga makabentaha gyud ang mga trabahanti nga tua sa gawas sa nasod.

Ang kabalaka lang ani, tungod kay nahimong batasan naman gud, kon matagbaw ba unya ang mga OFWs sa serbisyo sa maong bangko.

Lahi man gud ang programa nga atong mahibaw-an kay sa aktuwal nga implementasiyon sa programa.

Dili nato malikayan nga mobaton og pagduda ang mga tawo tungod sa daghang mga kasinatian sa milabang mga administrasiyon.

Atong panghinaot lang nga mapatuman gayud kining bangko segun sa gilatid nga programa.

Kon mahitabo kini, wala nay gayuy katarungan pa nga magkalisod ang mga OFWs ug ilang pamilya.

Pwede sila nga mag-invest sa maong bangko ug makaminus pa unya sila sa ilang gasto sa remittance.

Pagkakaron gud, dagko kaayo og singil ang mga remittance outlet kon magpada ka og kwarta gikan sa abroad.

Atong paaboton unsaon unya sa gobyerno pag-implementar niining programaha kay pwerting daghana baya sa nasod nga gipangtrabahoan sa mga OFWs.

Tingali, pangagpas lang himoon kining online banking kay imposibli baya nga butangan sa gobiyerno ang matag nasod og OFW Bank.

Nasayod baya ta nga bisan sa labing gamay nga isla sa Pasipiko, ug sa bisan asang lugar sa kalibutan, duna gyoy Filipino.

Angay nato daygon ang administrasiyon ni Duterte pagpasiugda aning programaha kay tungod niana mahatagan na gayud ug kahulogan ang gipasiatab nga modern hero kining mga OFWs.