Sugba, tola ug bulad sa Cebu

Jaime A. Frias II

ANG dakbayan sa Sugbo mao ang kinadaghanan nako og balik sa tibuok suroyanan nako.

Usa sa dakong rason mao ang akong matag tuig nga panaad sa Sto. Niño de Cebu, diin moduyog ako kanunay sa prusisyon. Pagka-ugma niana, mosaksi dayon ako sa patsada nga preparasyon sa Sinulog.

Apan niaging semana, nakadesisyon ako moadto og balik sa mahimuubo nga panahon tungod sa Liga ng mga Barangay Mindanao Island Congress didto sa Waterfront Casino and Hotel, Lahug.

Tungod man kay napugos ako tungod sa akong suod nga higala nga Barangay Chairman sa Tablon nga si Romeo Bacarro. Naenganyo ako niya kay usa sa mohatag og pahayag sa panagtagbo mao si Presidente Rodrigo Duterte.

Kay daw posibleng ituki niya ang postponement sa election kung agi ba sa extension o appointment. Apan, nakugang ang tanan kay wala mitunga ang Presidente tungod sa Asean Summit.

Tuod napalaw kami nga mga opisyales sa barangay sa pulo sa Mindanao, wala ako nagmausik sa akong oras didto kay nakalakbit ako pagbisita sa wala pa nako maadtoan nga lugar didto sa Cebu.

Didto duol sa SM Cebu portside (karaang SM didto), anaay duha ka kan-anan diha nga galaray og serbisyo sa tinolang mamsa ug sinugbang taslik (hinaut sakto ang ngalan akong nakuha) nga pwerteng busoga nako uban sa mga opsiyales nagtultol kanako.

Gani si chairman Andrew Meliza sa Barangay Agusan, kinsa nagsaulog sa iyang adlawng natawhan anang adlawa, maoy nagdala kanako sa usa ka kan-anan diha nga ginganlan og A-One.

Daghan gadagsa didto apil ang silingan niana tungod sa iyang kalami ug sulit nga presyo.

Ang tinolang mamsa gigutad sa dako ug nagkantidad og P80. Lasa pa’y imo nga pwerteng lamia nga daghan lamas.

Ang sugbang taslik pwerteng dakoa ug tam-is nga mokabat sa P220 nga pwede nga upat kamo.

Nakahuna-huna sab kami unsay i-pasalubong. Gawas sa ilang sikat nga otap o delicacies didto, nakahunahuna kami magpalit og bulad nga dangit ug pusit.

Ang maayo ug barato magpalit matod sa mga Sugboanon didto sa Taboan. Tayming sab nga nay festival nila sa bulad anang lugara.

Tungod sa kadako sa Cebu, mao ning mga dayohonon nga kan-anan ug merkado nga wala pa nako sukad maadtoan hangtod nakatultol ako.

Sulaya ninyo kung makaadto kamo didto. Makaingon ka gyud og “ngilngig.”