Todino: Naka-druga kaha siya

Junhan B. Todiño

NAKAPUNTO si Bise Presidenti Leni Robredo sa iyang ulahing pamahayag kabahin sa kampaniya sa drugas.

Gusto niya mosagop ang gobiyerno og pamaagi sama sa programa nga gihimo sa Portugal - ang pag-decriminalized sa druga.

Ang pag-decriminalize nagpasabot kana – paubsan ang silot, o i-regulate ug himoong legal ang illegal pinaagi sa pag-usab sa balaod.

Apan, kon ingon ani man lang ang sugyot ni Robredo, mas maayo tingali hinuktokan niya pag-ayo ang tiunay nga sitwasiyon sa Pilipinas.

Dawaton nato kining pagpakabana ni Robredo sa problema sa drugas apan murag salikwaot ang iyang suggestion.

Wa ba diay siya masayod nga sugad gi-decriminalized sa Portugal ang drugas, nagpabilin man gihapon ang pagsaka sa problema sa drugas sa ilang nasod.

Hinuon, nikunhod ang ilang kaso sa sexually transmitted disease sama sa Acquired Immunodeficiency Syndrome-Human Immunodeficiency Virus ug mga patay gumikan sa paggamit sa drugas.

Ug nganong karon pa man intawon si Robredo nakakita og pamaagi pagsumpo sa drugas.

Kon tiunay siya nga concern gyud sa problema nganong di man siya moalalay sa programa ni Presidenti Duterte.

Ang gihimo hinuon niya mao ang pagpakaulaw sa Pilipinas ngadto sa tibuok kalibutan pinaagi sa paghimohimo og estorya nga ang 7,000 ka mga tawo nga gipang-ihaw biktima sa extra-judicial killing - nagpasabot gipangpatay lang kini nga wa masubay sa balaod.

Ambot kon nasayod ba si Robredo kon unsa ka lala ang suliran sa drugas sa Pilipinas karon.

Busa, iya untang hinuktokan nga lahi ang sitwasiyon sa Pilipinas ug sa ubang nasod kabahin sa isyu sa drugas.

Dinhi sa atua, daghang mga opisyal mismo sa gobiyerno gikan sa labing ubos nga katungdanan sa barangay konsehal, barangay kapitan ngadto sa mga konsehal sa munisipyo, mayor hangtod na gani sa provincial board member ug goberenador, mga kongresista – ug sa military, kapolisan ug uban pang-nangatungdanan sa gobiyerno - nangalambigit sa drogas.

Suma, kinsa man ang mga protector sa drugas dinhi sa Pilipinas? Basin wa mahibaw si Robredo.

Kining pamahayag ni Robredo sama ra nga iyang gikwesiyon ang programa ni Duterte pagsumpo sa ginadiling drogas.

Wala ba diay mahibaw atong bise presidenti nga dunay mga rehabilitation center nga gipangtukod ang administrasiyon ni Duterte karon.

Nagtuo tingali si Robredo nga pulos lang pagpangsikop ug pagpang-ihaw sa mga tawo nga nalambigit sa drugas ang gihimo ni Duterte.

Mao nay problema lagi kon dunay ngil-ad nga motibo atong pangatungdanan – nga pulos nalang alang sa personal interest ug sa interest sa partido.

Angay untang magpasalamat si Robredo kay nikunhod na karon ang problema sa drugas kon itandi sa miaging administrasiyon.

Wala ba kaha maka-druga atong bise presidenti sa paghimo niya og pamahayag nga dili na himoon kremin ang paggamit og drogas?