Todino: Pensiyon sa senior citizen

Junhan B. Todiño

DUNAY kapin sa 40 mil ka mga senior citizen ang dakbayan, apan duolan lang ngadto sa 3 mil ang nakapahimus sa social pension gikan sa Department of Social Welfare and Development (DSWD) karong bulana, matod sa report sa SunStar Cagayan de Oro ni Pamela Jay Orias.

Hinuon, gipaniguro ni Julius Pamisa, ang atong City Social Welfare and Development officer duna pay dugang 1,500 senior citizen ang makadawat usab sa ayuda sa gobiyerno.

Kon basihan nato ang lista sa DSWD, wala gani moabot og 90 porsento ang nahatagan og pensiyon.

Dili ta motuo nga walay gahin ang gobiyerno alang niining programaha.

Mas maayo tingali ipasabot ni Pamisa nganong hinay ang pag-uswag sa ilang pag-apod-apod ug ayuda ngadto sa mga senior citizen.

Basi sa ilang program, modawat og P500 matag bulan ang kwalipikado nga senior citizen o kadtong nagpanuigon og 60 anyos ug pataas nga walay gidawat nga pension gikan sa pribadong kompaniya o gobiyerno, walay kita o gidawat nga suporta gikan sa iyang pamilya.

Matod ni Pamisa ilang hatagan og prayoridad ang 3,011 ka mga senior citizens nga bed-ridden o nagkasakit ug kadtong nagpanuigon og 80 anyos ug pataas.

Maka-apply pa hinuon ang ubang senior citizen sa DSWD aron makakuha sab sila sa maong benepisyo.

Nakita sa DSWD ang panginahanglan ug gani, dunay hatagan nila og prayoridad.

Ang pangutana, unsa man kadali ang pagtunol nila og hinabang ngadto sa mga nagmasakiton ug kadtong guwang na intawn kaayo?

Mas ganahan maminaw ang publiko sa pamahayag sa taga DSWD kon ilang paspasan ang pag-irog sa ilang proseso, kana kon duna silay sistema.

Gilakbitan nato dinhi kining sitwasiyon karon sa pag-apod-apod og pension sa mga senior citizen aron mapungan nato ang posibleng palpak nga sistema nga mosangpot na hinuon sa pagka-kompromiso sa mga senior citizen nga modawat unta sa hinabang.

Kon gusto gyud motabang ang gobiyerno, dili ta magpaabot nga moduol ang mga senior citizen aron magparehistro.

Dad-on nato mismo ang buhatan sa DSWD ngadto sa mga barangay aron toltolon ug ipanglista kadtong mga kwalipikado nga senior citizen. Basin mas daghan pa sila kay sa lista sa DSWD nga 40 mil.

Lisod man gud kon dili ta mag-proactive sa programa kay kanunay moatras ug maulahi ang atong kalihukan.

Busa, angay lang seryosohon sa DSWD kining program sa senior citizen, kay gawas nga “gamay” ra man unta kaayo ang hinabang, dili pud tanan ang makapahimus.

Atong pahinumdoman kanunay ang mga ahensiya sa gobiyerno sa baruganan ni Presidente Duterte alang sa mas hapsay, mas paspas, mas dali ug makiangayon nga serbesyo ngadto sa publiko.