Todino: Kaso sa 2 ka media outlets

Junhan B. TodiƱo

NGANONG hangtod karon wala pa man gayud mopagawas og pamahayag ang management sa ABS-CBN ug ang Philippine Daily Inquirer kabahin sa pasangil ni Presidente Duterte?

Sa daghang higayon atol sa iyang pagkigpulong kanunay gibatbat ni Duterte ang dili makiangayon nga pag-report sa duha ka higanting media outlet sa nasod. Halos mga negatibong balita batok sa administrasiyon ni Duterte ug sa pagka-tawo mismo sa presidenti maoy kinaham sa duha ka media outlets.

Gibulgar usab ni Duterte nga panahon sa pangampanya duna siyay political ads nga wala gipagawas sa ABS-CBN.

Nabayran naman unta ang political ads apan wala gi-deliver sa maong estasyonan. Unsa ni pangilad?

Apan, ang nakapalimbahot sa balhibo mao kining giingon ni Duterte nga dunay utang kapin sa usa ka bilyon ka pesos sa buhis ang Dunkin Donuts. Kining Dunkin Donut gipanag-iya sa tag-iya sa Philippine Daily Inquirer.

Gimaniobra daw ni kanhi Bureau of Internal Revenue Commissioner Kim Henares aron makalingkawas sa bayronon sa buhis ang Dunkin Donuts. Unya diay gagmayng negosyante ug yanong trabahante, diosnon nga nagbayad sa ilang buhis matag tuig. Dili sila mauwaw!

Ang pagpakahilom sa mga Lopez sa ABS-CBN ug sa mga Prieto sa Philippine Daily Inquirer ug Dunkin Donuts nagpasabot ba nga tinuod ang pasangil?

Kon ingon ani ang tratamento sa duha ka dagkong buhatan sa media sa Pilipinas nga magpakahilom, unsaon nato pagbaton og hingpit nga pagsalig ug pagtuo kanila. Ganahan pa kaha ta maninaw ug mobasa sa ilang report?

Kanunay gipasiatab sa mga media nga makiangayon sila, mopalig-on sa hustisya ug demokrasya, manalipod sa dinaogdaog ug kabus, ug mopatunhay sa kamatuoran.

Apan, niining sitwasyona unsa may gipalabi sa duha ka media outlets, ang ila ba kahang obligasyon sa publiko pinaagi sa pagsulong sa ilang misyon o ang ilang interest pagpadako sa ilang negosyo?

Kon duna may himoon imbestigasiyon bahin niining pagpug-ok sa buhis sa Dunkin Donuts, kinahanglan himoon na.

Angay lang gukdon sa gobyerno, labi na sa administrasyon ni Duterte, kining mga negosyante nga dili mobayad sa ilang buhis.

Ambot kon duna pa kahay kredibilidad ug integridad kining duha ka media outlets ngadto sa komunidad, kon tinuod man ugaling ang maong mga alegasiyon.

Niining sitwasyona karon, mas katuohan kining pasangil ni Duterte kay sa mga balita nga gipagawas aning ABS-CBN ug Philippine Daily Inquirer.