Todino: Dugang pasensiya una

NIADTONG pagduaw ni Presidente Duterte sa mga nasod sa Asya sama sa Indonesia, Thailand, Japan makita nato ang mainiton nga pagdawat sa mga opisyal sa nasod.

Apan, ang makapalimbawot sa balhibo mao kining pagsugat sa mga Filipino community uban sa daghang mga Overseas Filipino Workers (OFWs). Humana baya ang eleksiyon pero gipakita gihapon nila ang lig-ong suporta. Tiaw mo mangugat gayud sila og singgit “Duterte, Duterte.” Wala ni sukad nahitabo sa miaging mga presidenti nga mobisita gawas sa nasod.

Niadtong Dominggo, nagtigum na sab ang mga tigpaluyo ni Duterte. ilang singgit mao ang pagpalagpot kang Bise Presidenti Leni Robredo.

Ang panagtigum sa Luneta nanakod sa ubang bahin sa kalibutan. Dunay nag-rally usab sa ubang nasod nga daghang mga Filipino ang nasuko sa pagpakaulaw ni Robredo sa international community.

Unsa may buot ipasabot niini. Nganong nakakuha man og linibo ka mga tawo ang mga organizers aron ipadayag ilang sentimento batok sa bise presidente.

Gipaluyuhan kaha sa Malacangang ang maong kalihukan?

Kaniadto pa daan nang gipahibawo ni Duterte nga dili niya paluyohan ang tinguha pag.impeach ni Robredo. Dunay nag-ong-ong nga election protest nga gisang-at ni Bongbong Marcos. Seguro gusto ni Duterte hulaton nalang ang resulta sa election protest.

Apan, dili nato mabasol ang misalmot sa tigum niadtong Dominggo kay mabati sab nila ang kauwaw nga giladlad ni Robredo ngadto sa United Nation (UN). Nahinumdom mo nagpada og video message si Robredo sa UN ug iyang giyagyag ang kadautan ug baho sa Pilipinas. Maayo unta kon tinuod apan layo ra sa makatuoran ang tanan.

Mas maayo tingali dili nila dalidalion ang pagpalagpot kang Robredo kon gusto nila nga si Marcos maoy molingkod pagka-bise presidenti. Kon mahitabo gud ma-impeach si Robredo, ang presidente sa senado nga mao si Koko Pimentel maoy matudlo unya nga hulip kang Robredo.

Hinuon, mas pabor na gyud kaayo sa taga Mindanao kon gikan dinhi ang presidente ug ang bise presidente.

Tingali, kon unsa ka sibaw sa suporta nga gipakita sa mga OFW sa nagkadaiyang bahin sa kalibutan ug niadtong misalmot sa rally ngadto kang Duterte, mao usab unta ang pasensiya nga ilang huptan samtang gihikay na ang mga kaso pagpalagpot sa bise presidenti.

Usa lang ang tino nga mensahi niining gipakita sa mga tawo karon, nahimuot ug misalig sila sa katakos ni Duterte apan nasuko ug wala gayud ganahi ni Robredo.