Luczon: Maria Labo Digital

Nef Luczon

LAKI: “Si Maria Labo ba ka?”
Baye: “Ngano man?”
Laki: “Usahay naa, usahay wala. Ug kung naa, daghan maboang sa kahadlok.”

***

Subling mibalik na usab si Maria Labo, ug daw hinay-hinay na usab ang katawhan og hisgot niini niya nga ang uban mosugod na og “hysteria.” Ug labaw sa tanan, ang pagbalik niya digital na usab – kay samot nga nailhan siya sa mga kabatan-onan pinaagi sa social media. Sosyal gamay.

Kining “urban legend” kay Maria Labo nga gabalik-balik lang sa mga lugar nga dagha’g Bisaya nga gikan sa Visayas ngadto sa Dabaw. Ug bag-o nasab nga mikaylap sa Cagayan de Oro.

Wala koy personal nga kasayuran ani’ng butang, ang akong nahibal-an, gikahadlokan ni siya gumikan kay gamaligno ni siya sa mga ngitngit nga dapit sa kagab-ihon. Apan kaning alamat ni Maria Labo, nagka apo na tingali katong mga bata kaniadto nga gihadlok pud sa ilang ginikanan.
Nagdako na lang ko, lahi naman hinuon nga mga “Maria” akong nailhan sa mga ngitngit nga dalan.

Pahinumdom lang unta dyutay, tuig 2017 na. Kung duna may kahadlokan sa mga ngitngit nga dapit mao kanang mga buhing tawo nga dunay dautan nga tumong.

Bisan pa tuod nga “change is coming,” nagpabilin nga duna pa gihapong mga salbahis nga moabusar sa mga inosente. Busa mas mag matngon pa kita batok niini nila tali kang Maria Labo nga kutob ra sa mga istorya.

Busa importante usab nga luwas kanunay, maayo nga duna kay mga emergency hotlines pananglitan duna kay ma engkwentro nga mobahad sa inyong mga kinabuhi.

(nefluczon@gmail.com)