Todino: Daghang eskalawag nga pulis

Junhan B. Todiño

GUSTO ni Presidente Rodrigo Duterte ilabay ngadto sa Basilan ang kapin sa 200 ka badlongon nga mga pulis sa National Capital Region Police Office.

Gihatagan sa presidente og 15 ka adlaw pag-andam sa ilang pagbalhin sa Basilan, Sulu, Tawi-Tawi ug sa ubang dapit sa Mindanao aron maoy ikontra sa mga terorista ug kriminal.

Insakto ba kaha kining gibuhat ni Duterte?

Kon dili gusto mobalhin sa Mindanao, matod sa presidente, mag-resign nalang sila sa ilang katungdanan.

Nibahad sab ang presidente nga ilang i-monitor kining mga pulis nga mobiya sa katungdanan kay sagad mahitabo gud motipon sila sa mga ilegal nga kalihukan.

Sa iyang pagsugod sa katungdanan, si Duterte nipahibaw nga iyang tumanon ang saad nga padak-an ang suweldo sa kapolisan.

Gisubli sa presidente ang iyang saad ug karong tuiga hayan pamatuman na gayud ang pag-uswag sa suhulan sa mga pulis.

Makita nato kon unsa ka seryoso ang presidente sa iyang tinguha nga mapalambo ang panginabuhi ug trabaho sa usa ka pulis.

Apan, sa samang higayon, tataw sab ang iyang kasuko ug kalagot niadtong mga badlongon.

Nakaseguro ta nga dunay gipatuman nga due process alang niadtong mga pulis nga gipasanginlan nga nangalambigit sa ilegal nga kalihukan.

Ug samtang dunay imbestigasyon, maayo tuod nga ilabay ni sila sa Basilan aron maputol na ilang hiwi nga binuhaton sa kaulohan.

Dinhi sa atong dakbayan, nunot sa kampaniya sa Malacanang batok sa badlongon nga mga pulis, ang Cagayan de Oro City Police Office mopalihok na usab sa ilang Counter-Intelligence Task Force.

Matod sa tigpamaba sa Cocpo nga si Chief Inspector Mardy Hortillosa ang task force maoy mo-monitor ug moutingkay sa mga impormasyon aron maila kining mga eskalawag nga sakop sa Philippine National Police (PNP).

Atong panghinaot lang nga dili gamiton kining task force paggukod adtong mga pulis nga dunay personal nga interest, kon dili gamiton kini alang sa iyang insaktong katuyoan.

Basin baya mas daghan unya ang mga inosente ug buotan nga mga pulis nga mabutang sa alanganin tungod sa sayop nga pasangil tungod lang kay giinitan ug gikaselosan sa opisyal.

Sa kinatibuk-an, makaayo sa imahen sa kapolisan kining kampanya karon sa Malacanang paglimpyo sa PNP gikan sa mga eskalawag nga pulis.

Kon gihimo kini kaniadto pa, dugay ra unta mibalik ang pagsalig sa katawhan ngadto sa kapolisan.

Pagkakaron, dili pa gayud hingpit atong pagsalig aning mga pulis, labi na kon matag karon ug unya mosulpot kining balita nga dunay pulis nalambigit sa mga binuang.

Dili pa gayud nato mawala kining expression nga “hayahay pas pulis.”